توركیا و سوریا و ده‌وڵه‌تی كوردی ... كاوه‌ ئه‌مین
ئه‌م ڕۆژانه‌، ڕۆژهه‌لآتی ناوه‌ڕاست كۆمه‌ڵێك كۆڕانكاری نوێی به‌خۆیه‌وه‌ بینی، كه‌ جێگای تێڕامانن. له‌ لایه‌ك سه‌ردانی سه‌رۆككۆماری سوریای عه‌ره‌بی به‌شار ئه‌سه‌د بۆ توركیا،كه‌ ئه‌وه‌ یه‌كه‌مین جاره‌ له‌ دوای سه‌ربه‌خۆیی سوریا، سه‌رۆككۆمارێكی ئه‌و ولآته‌ سه‌ردانی توركیا بكات. له‌ لایه‌كی تره‌وه‌ بومه‌له‌رزه‌كه‌ی شاری بام له‌ ئێران و ڕێگادان به‌ هاوكاریه‌كانی ئه‌مریكا به‌ قوربانیه‌كانی ئه‌و كاره‌ساته‌، شیمانه‌ی ئه‌وه‌ی لێ ده‌كرێت كه‌ ئێران و ئه‌مریكا زیاتر له‌یه‌ك نزیك ببنه‌وه‌ و لاپه‌ڕه‌یه‌كی نوێ له‌ سیاسه‌تی ده‌ره‌وه‌ی ئه‌و دوو ولآته‌، بكاته‌وه‌.
له‌ باشووری كوردستانیش مه‌ترسی په‌شێمانبوونه‌وه‌ نوێنه‌رانی ئه‌نجومه‌نی حوكووم (كورده‌كانی لێ ده‌رچێت) له‌ فیدراڵی، ترسی خسته‌ ناو دڵی سه‌رانی پارتی و یه‌كیه‌تییه‌وه‌،چونكه‌ له‌ دواجاردا هه‌ڕه‌شه‌یه‌ بۆ ده‌سه‌لآتی ئه‌و دوو پارته‌ كه‌ چه‌ندین ساڵه‌ هه‌ریه‌كه‌ و له‌ ولایه‌تی خۆیدا حوكومڕانی ده‌كات. ئه‌مه‌ بووه‌ هۆی كه‌ سه‌ركرادیه‌تی ئه‌و دوو پارته‌ گوڕ و تین بده‌ن به‌ دانیشتنه‌كانیان و په‌له‌ له‌ یه‌كگرتنه‌وه‌ی ئیداره‌كانیان بكه‌ن، چونكه‌ ئه‌م جاره‌، كاسه‌كه‌ به‌سه‌ری هه‌موو كورددا به‌وانیشه‌وه‌، قڵپ ده‌كرێته‌وه‌.
هه‌م سوریا و هه‌میش توركیا له‌م نزیكبوونه‌وه‌یه‌ نیگه‌رانن و به‌ ئاشكرا ناڕازیبوونی خۆیان نیشاندا. به‌شار ئه‌سه‌د كه‌ كۆپییه‌كی باوكییه‌تی و له‌ گۆلی شۆفینیزمی عه‌ره‌ب به‌ دژی كورد فێری مه‌له‌ی سیاسه‌ت بووه‌، پێش به‌رێكه‌وتنی بۆ توركیا، به‌ ئاشكرا هه‌ڕه‌شه‌ی له‌ كیانێكی كوردی كرد. توركه‌كانیش نه‌ك ته‌حه‌مولی ده‌وڵه‌تی كوردی به‌ڵكو گۆرانییه‌كی كوردیش ناكه‌ن.
ئه‌گه‌ر پارتی و یه‌كیه‌تی نیازیان پاك بێت، هه‌ر هیچ نه‌بێت له‌به‌ر خاتری ده‌سه‌لآتی خۆیان حوكومه‌ته‌كانیان بكه‌ن به‌یه‌ك و ڕێگا بۆ هه‌ڵبژاردنێكی ئازاد بكه‌نه‌وه‌، به‌ تایبه‌تی "یه‌كیه‌تی ئاره‌زومه‌ندانه‌ی كورد" بكرێته‌ به‌ردی بناغه‌ی ئه‌و فیدرالییه‌ی كه‌ بانگاشه‌ی بۆ ده‌كه‌ن،ڕه‌نگه‌ له‌م گێژاوه‌ی كه‌ ڕۆژهه‌لآتی ناوه‌ڕاستی تێكه‌وتووه‌، كورد بتوابێت به‌ سه‌ركه‌وتووی ڕزگاری بێت.
خاڵێكی تر كه‌ زۆر گرنگه‌ بخرێته‌ ئه‌جندای كوردییه‌وه‌، ڕاپه‌رینێكی ئاشتیخوازنه‌یه‌ له‌ سه‌رتاسه‌ری كوردستاندا. چاره‌نووسی باشووری كوردستان، چاره‌نووسی هه‌موو كورده‌ بۆیه‌ ده‌بێت پارچه‌كانی تری كوردستان به‌ تایبه‌ت باكوور، بۆ پشتیوانی له‌ داواكانی گه‌لی كورد له‌ باشووری كوردستان، ڕاپه‌رینی جه‌ماوه‌ری ده‌ست پێبكه‌ن.
له‌ كاتی دانیشتنه‌كانی پارتی و یه‌كه‌یتی له‌ هاویه‌نه‌ هه‌واری دوكان،خۆپیشاندانی دایك و باوك و كه‌سوكاری ئه‌نفالكراوی شه‌ڕی ناوخۆ له‌ هه‌موو برینه‌كانی تر به‌ سۆ تر بوو(كوردسات شه‌وی 6/1).
ئه‌و مندالآنه‌ی كه‌ داوای به‌ردانی باوك و كه‌سوكاریان ده‌كه‌ن كه‌ له‌لایه‌ن پارتی و یه‌كیه‌تیه‌وه‌ سه‌رنگوم كراون یان زیندانی كراوان، ده‌بێت چ دڵێكیان به‌ یه‌كگرتنه‌وه‌ و ته‌نانه‌ت ده‌وڵه‌تی كوردیش خۆش بێت، به‌ ڕاست ئه‌م شه‌رمه‌زارییه‌ هه‌تا كه‌ی؟ ئه‌م ڕیسوواییه‌ بۆ، له‌ پێناوی چیدا؟