كاتی به‌رنامه‌كانی به‌شی كوردی ڕادوێی تاران كه‌م ده‌كرێته‌وه‌ ... كاوه‌ ئه‌مین
به‌ گوێره‌ی هه‌واڵێك كه‌ له‌ ماڵپه‌ری ئازادیا ولآت بلآوكراوه‌ته‌وه‌،كاتی به‌رنامه‌كانی به‌شی كوردی ڕادوێی تاران له‌ حه‌وت كاتژمێره‌وه‌ ده‌كرێت به‌ چوار كاتژمێر. ده‌سه‌لآتدارانی ئێران به‌م هه‌نگاوه‌یان هه‌نگاوێكی تریش له‌ چاره‌سه‌ری كێشه‌ی كورد له‌ ڕۆژهه‌لآتی كوردستان خۆیان دوورده‌خنه‌وه‌.
له‌ دوای هاتنی خاته‌می بۆ سه‌ر حوكووم، كورده‌كانی ڕۆژهه‌لآت كه‌ڵكیان له‌و ڕه‌وشه‌ نوێیه‌ی كه‌ ئێرانی تێكه‌وتبوو وه‌رگرت و ده‌یان كۆمه‌ڵه‌ی كولتووری و ڕۆشنبیری و ڕۆژنامه‌ و گۆڤار له‌ دایك بوون و كاریگه‌ری خۆیان له‌سه‌ر ڕه‌وتی ڕۆشنبیری و بزوتنه‌وه‌ی ڕزگاری كورد له‌و پارچه‌یه‌ی ولآت دانا. ئه‌م هه‌ڵوێسته‌ی ڕژێمی ئێران له‌گه‌ڵ ئه‌و ڕه‌وته‌ نوێیه‌ی ئه‌و ولآته‌ هاو ته‌ریبه‌ كه‌ ده‌یانه‌وێت هه‌موو ده‌نگێكی دیموكراتیخواز له‌و ولآته‌دا خامۆش بكه‌ن.
كه‌م كردنه‌وه‌ی به‌رنامه‌كانی ڕادوێی كوردی تاران پێشێل كردنی مافی هه‌زاران كه‌سه‌ كه‌ له‌ زمانی كوردی زیاتر هیچ زمانێكی تر نازانن له‌و ولآته‌دا. ئه‌گه‌رچی ڕادوێی تاران ڕادوێیه‌كی ده‌وڵه‌تییه‌ و له‌ژێر سێبه‌ری سیاسه‌ته‌كانی ده‌وڵه‌تدا وه‌شانی خۆی ده‌كات، به‌لآم ئه‌وه‌ی كه‌ به‌زمانی كوردی وه‌شان ده‌كات بۆ پێشكه‌وتنی زمانی كوردی بێ كاریگه‌ر نییه‌. شایه‌نی وتنه‌ كه‌ ڕادوێی ناوبراو په‌نجا و حه‌وت ساڵه‌ به‌ زمانی كوردی وه‌شانی هه‌یه‌. ئه‌م كرده‌وه‌ نامرۆڤانه‌یه‌ی ئێران ده‌كرێت سه‌ره‌تایه‌ك بێت بۆ فشارهێنان بۆ سه‌ر ڕۆشنبیران و بزوتنه‌وه‌ی كولتووری كوردی له‌ ڕۆژهه‌لإتی كوردستان به‌ تایبه‌تی و ئێران به‌ گشتی.
پرسیاری سه‌ره‌كی ئه‌وه‌یه‌ ئایا كورده‌كانی ڕۆژهه‌لآت له‌به‌رانبه‌ر ئه‌م سیاسه‌ته‌ نوێیه‌ی ئێران هه‌ڵوێستیان چی ده‌بێت؟