ئیسرایل و وێنه‌یه‌ك ... كاوه‌ ئه‌مین

له‌م ڕۆژانه‌ی پێشودا، سه‌فیری ده‌وڵه‌تی ئیسرایل Zvi Mazel له‌ ستۆكهۆڵم،پیشانگای هونه‌رمه‌ندێكی سوێدی تێكداچونكه‌ ئه‌و پێی وابوو به‌و كاره‌ سوكایه‌تی به‌ جولكه‌كان كراوه‌. له‌ پێشانگاكه‌دا هه‌ر وه‌ك له‌ وێنه‌كه‌دا دیاره‌ وێنه‌یه‌كی ئه‌و ژنه‌ فه‌له‌ستینیه‌ی Hanadi Jaradit كه‌ خۆی ته‌قاندوه‌ له‌ ئیسرائیل و به‌خۆیه‌وه‌ گه‌لێك كه‌سی تریش كوشت.
ئه‌م كاره‌ی سه‌فیری ئیسرایل بووه‌ هۆی ده‌مه‌قاڵه‌ی دیبلۆماسی ده‌وڵه‌تی سوێد و ئیسرایل و كار گه‌یشته‌ ئه‌وه‌ی كه‌ سه‌فیر زیڤی، له‌لایه‌ن وه‌زاره‌تی ده‌ره‌وه‌ی سوێد بانگ بكرێت، تا ڕاسته‌وخۆ ناڕه‌زایه‌تی خۆیان دژی ئه‌و كاره‌ی زیڤی مازیل ده‌رببڕن. به‌لآم ئاغای زیڤی نه‌ك هه‌ر په‌شێمان نه‌بوو له‌ كاره‌كه‌ی به‌ڵكو وه‌كو كارێكی پێویستی له‌قه‌ڵه‌م دا، هه‌رچه‌نده‌ بۆ كه‌م كردنه‌وه‌ی ده‌ماقاڵه‌كه‌یان ئه‌وه‌شی وت كه‌ ئه‌و به‌ ئیحساسه‌وه‌ ئه‌و كاره‌ی كردووه‌. سوێدیش له‌لای خۆیه‌وه‌ پێی وایه‌،تێكدانی پیشانگایه‌ك دژایه‌تییه‌ له‌گه‌ڵ ئازادی ڕاده‌ربین.
ئه‌وه‌ی كه‌ من مه‌به‌ستمه‌ له‌ نووسینی ئه‌م چه‌ند دێره‌،باسی خراپی یان چاكی ئه‌و كاره‌ی سه‌فیری ئیسرایلی نییه‌،به‌لآم شتێك هه‌یه‌ ئه‌ویش هه‌ستی به‌تینی ئیسرایلیه‌كان بۆ ولآت و خاك و نه‌ته‌وه‌كه‌یان، ئه‌وان له‌ هیچ شتێك ناپرینگێنه‌وه‌ و شه‌رم له‌هیچ شتێك ناكه‌ن، كاتێك بێته‌ سه‌ر مه‌سه‌له‌ی نه‌ته‌وه‌ییان، هه‌ر بۆیه‌ ئه‌م كاره‌ی سه‌فیری ئیسرایلی له‌لایه‌ن سه‌رۆكوه‌زیرانی ئه‌و ولآته‌ (شارۆن)یشه‌وه‌ ده‌ست خۆشی و پشتیوانی لێكرا.
ئێمه‌ی كورد ده‌بێت له‌ ئیسرایلیه‌كانه‌وه‌ فێربین كه‌ قوربانیه‌كانی خۆمان به‌كه‌م نه‌گرین و كاتێك سوكایه‌تی به‌ كه‌رامه‌تی نه‌ته‌وه‌یاتیمانه‌وه‌ ده‌كرێت به‌دژی بووه‌ستینه‌وه‌، دیاره‌ ئه‌م قسانه‌ بۆ پشتیوانی له‌ سیاسه‌تی شه‌ڕه‌نگێزانه‌ی ئیسرایل نییه‌ له‌ ڕۆژهه‌لآتی ناوه‌ڕاستدا،به‌لآم به‌ ڕاستی سه‌لماندویانه‌ كه‌ ئه‌وان مرۆڤی خۆیان لا به‌قیمه‌ته‌.
تۆ بڵێی ڕۆژێك بێت ده‌سه‌لآتدارنی كوردیش، وه‌كو پێویست له‌ به‌ها نه‌ته‌وه‌ییه‌كانی كورد ده‌ربكه‌ون؟ یان وه‌ك چۆن وه‌فیق سامه‌ڕایی و نزار خه‌زره‌جی و جڕوجانه‌وه‌ره‌كانی تریان به‌خشی، ئه‌وانی تریش ده‌به‌خشن؟ ئه‌وانه‌ی ئیمڕۆ له‌و په‌ڕی لاوزایدان و ددان نانێن به‌ كورد و كوردستاندا،له‌ ئاینده‌یه‌كی نزیك دا، هه‌رهێنده‌ی سوپاكه‌یان پێی گرت و كه‌ڵبه‌كانی ڕوا،ئه‌وه‌ی كه‌ سامه‌ڕایی و خه‌زره‌جی بۆیان ته‌واو نه‌كرا، ته‌واوی ده‌كه‌ن!