به‌خێرچی مێدیاتیڤی
تۆش سه‌رچاوان بێیت "ڕۆژ تیڤی" ...
كاوه ئه‌مین

هه‌ردوو ده‌وڵه‌تی كۆڵۆنیالیستی به‌ریتانیا و فه‌ڕه‌نسا كه كوردستانیان پارچه پارچه كرد و له سه‌ر سفره‌ی زێڕین پێشكه‌شی تورك و عه‌ره‌ب و فارسیان كرد، ڕاسته‌وخۆ یان ناڕاسته‌وخۆ ده‌ستیان به‌خوێنی هه‌زاران كورد سووره. به داخستنی تیڤی مێد و مێدیا، په‌ڵه‌یه‌كی ڕه‌شی‌تریشیان نا به ته‌وێڵی مێژوویانه‌وه و به‌م كاره‌یان ده‌سته چیلكه‌یان هاویشته سه‌ر ئاگری توورانیه‌كان و هاوجۆره‌كانیان كه‌ ده‌یان ساڵه كوردستان و كوردی پێده‌سووتێنن.

داخستنی مێدیاتیڤی شتێكی ڕێكه‌وت نییه و هیچ پاساوێكی یاساییشی نییه به‌ڵكوو بڕیاریكی سیاسییه ‌و به‌فیتی توركان كراوه.

جێگای گومانه كه سێ ڕۆژ پێش ساڵوه‌گه‌ڕی پێنج ساڵ تێپه‌ڕبوون به‌سه‌ر ته‌سلیمكردنه‌وه‌ی به‌ڕێز عه‌بدوڵڵا ئۆجه‌لان به توركیا له‌لایه‌ن ده‌ستگا سیخوڕییه‌كانی ئه‌ورووپاوه، مێدیا تیڤییش ده‌نگی نه‌ته‌وه‌ی بێ ده‌وڵه‌تی كوردان داده‌خرێت. ئه‌مه‌ش جێبه‌جێكردنی ئه‌ڵقه‌یه‌كی‌تری ئه‌و گه‌له‌كۆمه‌كییه‌ی نێونه‌ته‌وه‌ییه‌یه به‌دژی كورد كه توركیا سه‌ركێشی ده‌كات. ده‌كرێت كاره تیرۆریستییه‌كه‌ی یه‌كی شوباتی هه‌ولێر له‌گه‌ڵ داخستنی مێدیا پێكه‌وه گڕێ بدرێن و هه‌موویان بخرێنه یه‌ك چوارچێوه‌وه. مێدیا و مێد تیڤی له هوشیاركردنه‌وه‌ی هه‌ستی نه‌ته‌وه‌یی و بنیاتنانه‌وه‌ی كه‌سایه‌تیی نه‌ته‌وه‌یی كورددا پێشه‌نگ و سه‌رقافڵه‌چیی ئه‌و كاروانه‌ن، بۆیه هه‌ر وه‌ك چۆن كورد شانازی به ئیمپراتۆریه‌تی ماده‌وه ده‌كه‌ن ئاواش شانازی به مێد و مێدیاتیڤییه‌وه ده‌كه‌ن.

سوپاس بۆ ئه‌وانه‌ی كه بیریان له‌و ماڵانه كرده‌وه له ئاسمان بۆ كورد و ئێوه‌ش كارمه‌ندانی ئه‌و دوو ده‌ستگا نه‌ته‌وه‌ییه كوردییانه ماندوو نه‌بن و كاروانتان به‌خێر بێته‌وه. گومانیش له‌وه‌دا نییه كه له‌كاتێكدا كه زۆر ده‌وڵه‌تانی جیهان كه‌ناڵی ئاسمانیان نه‌بوو، كورد ڕچه‌شكێنی بۆ کردن. كارمه‌ندانی مێدیا ده‌سته‌وه‌ستان دانانیشن و هاكا ده‌نگۆی دامه‌زراندنی "ڕۆژ تیڤی" كه بۆته گفتوگۆی خه‌ڵكی و كۆڕ و كۆمه‌ڵه‌كان، دڕی به شه‌وه‌زه‌نگی جه‌هاله‌تی كه‌مالیزم دا. بۆیه من له ئیستاوه پیرۆزبایی هه‌ڵهاتنی ئه‌و "ڕۆژه" ده‌كه‌م و هیوادارم هه‌موو ئه‌وانه‌ی كه‌ له مێد و مێدیاوه به‌دیداریان شاد بووین، جارێكی‌تر شادمان بكه‌نه‌وه.


)