زامی هه‌ولێر
كاوه‌ ئه‌مین
یه‌كه‌م جار كه‌ هه‌واڵی هێرشه‌كه‌ی هه‌ولێرم بیست، له‌ ماڵی خزمێكمان دانیشتبووم، هه‌رچه‌نده‌ زۆر بڕوام به‌ جه‌ژن نییه‌، به‌لآم دیسانیش جه‌ژن وه‌كو كولتوورێكی كورده‌واری لێهاتووه‌. یه‌كه‌م جار وام ده‌زانی كه‌ وه‌كو جارانی تر ماشێنێكی پڕ له‌ ته‌قه‌مه‌نی له‌ به‌رده‌م ته‌لارێكدا ته‌قێنراوه‌ته‌وه‌، به‌لآم كاتێك كه‌ هه‌واڵه‌كه‌مان باشتر بۆ ڕووبووه‌وه‌ و زانیمان كه‌ دوو كه‌س یان چه‌ند كه‌س به‌ جلكی مه‌لایانه‌وه‌ یان به‌ جلی كوردییه‌وه‌ یانیش به‌ جلی ژنانه‌وه‌ خۆیان ته‌قاندۆته‌وه‌ به‌ جارێك ته‌زیم. به‌ تایبه‌تی كاتێك وێنه‌ی ئه‌وانه‌م بینی كه‌ ده‌سته‌ ده‌سته‌ به‌ خێرهاتنی میوانانیان ده‌كرد، له‌ هه‌مووشی به‌ سۆ تر ئه‌و مندالآنه‌ی كه‌ تاجه‌ گوڵینه‌یان پێ بوو،ئاخر ئه‌وان وه‌كو ئه‌و گولآنه‌ی ده‌ستیان وابوون. به‌ڵێ ئه‌وه‌ له‌ جه‌ژنێكدا كرا كه‌ به‌ سه‌دان حاجی كورد هێشتا له‌ مه‌ككه‌ن و نه‌هاتوونه‌ته‌وه‌، ئاخر ئه‌وان پێش ئه‌وه‌ی له‌ سنووری سعودییه‌ بپه‌ڕنه‌وه‌ زۆر سوكایه‌تیان پێ كرا، چونكه‌ نه‌یانده‌هێشت به‌ ئالآی كوردستانه‌وه‌ بچنه‌ ئه‌و دیوو.دنیایه‌كی سه‌یره‌ گوڵم، ئاخر له‌ ماڵی (خوا)شدا ئالآی كوردان به‌رزكردنه‌وه‌ی قه‌ده‌غه‌یه‌. بۆ نا ئه‌ی مه‌گه‌ر هه‌ندێك هه‌رچی و په‌رچی كورد كه‌ ده‌سه‌لآداریشن به‌ په‌ڕۆیه‌ك ناوزه‌دیان نه‌كرد و نه‌یان ده‌وت نابێت له‌سه‌ر په‌رۆیه‌ك هه‌ستی برایه‌تی گه‌لان بڕوشێنرێت.
ئه‌م زامه‌ی هه‌ولێر گه‌لی كوردی هه‌نگاوێكی تر له‌ یه‌كتر نزیك كرده‌وه‌، ئه‌گه‌ر پارته‌كان لێ گه‌ڕێن. ئه‌وه‌ نییه‌ ئامه‌د (دیاربه‌كر) سێ ڕۆژ شینیان ڕاگه‌یاندووه‌ و له‌ شاره‌كانی باكووری كوردستان خه‌ڵك هاتوونه‌ سه‌ر شه‌قامه‌كان. ئه‌و نییه‌ مهاباد ڕۆژێك پرسه‌ی داناوه‌، ئه‌وه‌ نییه‌ قامیشلی خۆی له‌ خم ناوه‌. ده‌ لێ گه‌ڕێن با ئه‌م یه‌كیه‌تیه‌ی كوردان جارێكی تر درزی تێ نه‌كه‌وێت.
چونكه‌ ته‌نها به‌وه‌ ده‌توانرێت ڕۆحی گیانبه‌ختكردوان شاد بێت.
هه‌ر كه‌ ئه‌و قسه‌یه‌ی سه‌رۆكی سوپای توركم دێته‌وه‌ بیر كه‌ وتوویه‌تی "ئه‌گه‌ر له‌ عێراق فیدراسۆنێك دروست ببێت، ئه‌وا ده‌بێت خوێن بڕژێت"، ده‌ڵێم ناكرێت میتی توركی ده‌ستی له‌م كاره‌دا نه‌بێت. ئاخر توركیا ده‌ڵێت ئه‌گه‌ر له‌ ئاسمان ماڵێك بۆ كورد دروست بكرێت تێكی ده‌ده‌ین.
پیره‌ هه‌ولێر، تۆ به‌ ته‌نها نیت، ئه‌وه‌ نییه‌ ئاماد وه‌ك هه‌میشه‌ له‌سه‌ر پێیه‌. تۆ ته‌نها نیت چونكه‌ ئیمڕۆ دڵی چل ملیۆن كه‌س له‌گه‌ڵ دڵی تۆدا لێ ده‌دات، ده‌هه‌سته‌وه‌ و له‌ قه‌لآوه‌، له‌ (مناره‌)كه‌ته‌وه‌ بانگی سه‌ربه‌خۆیی بده‌ و تیشكی كه‌سك و سوور و زه‌رد به‌ سه‌ر هه‌موو كوردستاندا ببه‌خشه‌وه‌، ده‌هه‌سته‌وه‌.