ئه‌نساره‌لئیسلام و ژه‌ندرمه‌ی تورك
كاوه‌ ئه‌مین
له‌م ڕۆژانه‌ی پێشوودا، ماڵپه‌ری Kurdishinfo.com هه‌واڵێكی بڵاوكرده‌وه‌ له‌ مه‌ڕ په‌یوه‌ندییه‌كانی گرووپی تیرۆریستیی ئه‌نساره‌لئیسلام و ژه‌ندرمه‌كانی توركیا و حیزبوڵڵا‌ی توركی. ئه‌مه‌ش دوای ئه‌وه‌ی كه‌ پۆلیسی نهێنیی نه‌رویجی ڕاپۆرتێكی ده‌رباره‌ی ئه‌نسار و مه‌لا كرێكار و په‌یوه‌ندییه‌كانی ئه‌و ڕێكخراوه‌یه‌ له‌گه‌ڵ توركیادا بڵاوكردۆته‌وه‌. له‌ ڕاپۆرته‌كه‌دا هاتووه‌ كه‌ گرووپی تیرۆریستیی ئه‌نسار گه‌لێك چالاكییان بۆ تێكدانی ئاسایشی باشووری كوردستان كردووه‌، بۆ ئه‌و مه‌به‌سته‌ش پێویستییه‌ ئابورییه‌كانیان له‌ ڕێگای توركیاوه‌ دابین ده‌كه‌ن. له‌ ڕاپۆرته‌كه‌دا هاتووه‌ كه‌ ته‌نها له‌ 17ی ئه‌یلولی 2001 به‌دواوه‌، له‌ نه‌رویجه‌وه‌ 18 ملیۆن كرۆنی نه‌رویجی له‌ ڕێگای توركیاوه‌ گه‌یشتۆته‌ ده‌ستی ئه‌نساره‌لئیسلام.
به‌ گوێره‌ی هه‌مان ڕاپۆرت ئه‌و پارانه‌ی كه‌ له‌ ئه‌وروپا كۆده‌كرێنه‌وه‌ له‌ ڕێگای توركیاوه‌ ده‌گه‌نه‌ ڕێكخراوی تیرۆریستیی ئه‌لقاعیده‌ و ئه‌لئه‌نسار. شایانی وتنه‌ كه‌ پێشتر پۆلیسی نهێنیی نه‌رویجی وشیارییان داوه‌ به‌ میتی توركی و پێیان وتون كه‌ ئه‌وان بڕوا به‌ میتی توركی ناكه‌ن. له‌ هه‌مان ڕاپۆرتدا هاتووه‌ كه‌ حیزبووڵڵا‌ و ئه‌نسـاره‌لئیسلام و ژه‌ندرمه‌ی تورك (JÎTEM) هاوكاریی یه‌كتر ده‌كه‌ن. بۆ ئه‌و مه‌به‌سته‌ش چه‌ندین ئه‌ندامی (JÎTEM) له‌ نێوان ساڵانی 2000 -2001 دا سه‌ردانی شاری هه‌ڵه‌بجه‌یان كردووه‌ و له‌گه‌ڵ سه‌ركرده‌كانی ئه‌نساره‌لئیسلامدا كۆبوونه‌ته‌وه‌.
ئه‌م ڕاپۆرته‌ی پۆلیسی نه‌رویجی كه‌ له‌م كاته‌دا بڵاوده‌كرێته‌وه‌ جێگای سه‌رنجه‌ چونكه‌ توركیا له‌ ماوه‌ی ئه‌م ده‌ ساڵه‌ی دواییدا به‌ ئاشكرا هه‌ڕه‌شه‌ی له‌ باشووری كوردستان كردووه‌ و ناڕازیبوونی خۆی بۆ پێكهێنانی قه‌واره‌یه‌كی فیدراڵی پیشان داوه‌. ته‌نانه‌ت جارێك سه‌رله‌شكری سوپای تورك وتبوی: ئه‌گه‌ر ده‌وڵه‌تێكی كوردی له‌ ئه‌رجه‌نتینیش دروستبكرێت، ئێمه‌ دژی ده‌وه‌ستینه‌وه‌. دوای ئه‌م كاره‌ساته‌ی هه‌ولێر نابێت حكوومه‌تی كوردستان له‌ باشوور چیتر چاوپۆشی له‌ هه‌بوونی هێزی به‌ناو ئاشتیپارێزی تورك كه‌ چه‌ندین ساڵه‌ له‌ باشوور دایانكوتاوه‌ بپۆشێت، به‌ڵكو ده‌بێت هه‌رچی زووتره‌ له‌ باشوور وه‌ده‌رنرێن.
چونكه‌ پێ ناچێت تیرۆریستان كه‌ ده‌وڵه‌تانی ناوچه‌ له‌ پشتیانه‌وه‌ن، به‌‌و تاوانه‌‌ی‌ له‌ هه‌ولێر كردیان دڵیان سوكنایی بێ، به‌ڵكو هه‌ر‌چییه‌كیان له‌ ده‌ست بێت درێغی ناكه‌ن بۆ تێكدانی ئارامی و ئاسایشی كوردستان، به‌ تایبه‌ت ده‌بێت كورد زۆر هوشیار بێت و ڕێگا نه‌دا هه‌ڵه‌كانی پێشوو دوباره‌ بكرێنه‌وه‌ به‌ تایبه‌ت شه‌ڕی كورد به‌ كورد به‌ كوشتدان.
سه‌رچاوه‌ی هه‌واڵه‌كه‌:
www.kurdishinfo.com
Norweç: Ensar El Îslam bi JÎTEM ê re dixebite
Wednesday, 04.February. @ 18:57:55 GMT