یه‌كێتی ڕۆژنامه‌نووسانی عه‌ره‌ب له‌ خه‌می پارچه‌بوونی عێراقدان...
كاوه‌ ئه‌مین
له‌ 25-30 ئه‌م مانگه‌دا،كۆنگره‌ی یه‌كێتی ڕۆژنامه‌نووسانی جیهان له‌ ئه‌سینای پایته‌ختی یۆنان ده‌به‌سترێت.سه‌ندیكای ڕۆژنامه‌نووسانی كوردستانیش كه‌ ئه‌ندامی فیدراسیۆنی ڕۆژنامه‌نووسانی جیهانن،به‌ فه‌رمی بانگهێشتی كۆنگره‌كه‌ كراون.
ئه‌م بانگهێشته‌نه‌ بووه‌ هۆی ناڕه‌زایه‌تی سه‌ندیكای ڕۆژنامه‌نووسانی عه‌ره‌ب كه‌ ناوه‌نده‌كه‌ی له‌ قاهیره‌ی پایته‌ختی میسره‌،به‌ به‌هانه‌ی ئه‌وه‌ی كه‌ به‌شداری ڕۆژنامه‌نووسانی كورد زه‌ره‌ری بۆ یه‌كپاره‌چه‌ی خاكی عێراق هه‌یه‌. سه‌ندیكایی عه‌ره‌به‌كان كه‌ له‌ یه‌كیه‌تی ڕۆژنامه‌نووسانی 22 ده‌وڵه‌تی عه‌ره‌بی پێكدێت،وه‌كو هه‌ر سه‌ندیكایه‌كی تری ئه‌و ولآتانه‌ به‌شێوه‌یه‌كی ڕه‌سمیش نه‌بێت سیاسه‌تی ولآته‌كانیان ده‌پارێزن.هه‌ره‌وه‌ك بینراش به‌شێكی زۆری ڕۆژنامه‌نووسه‌ ناوداره‌كانی عه‌ره‌ب تا ڕوخانی سه‌ددامیش له‌ ڕژێمی به‌عسه‌وه‌ هاوكاری داراییان پێده‌كرا.
ئه‌م هه‌ڵوێسته‌ی ڕۆژنامه‌نووسانی عه‌ره‌ب له‌ كاتێكدایه‌ كه‌ چه‌ند مانگێك تێنه‌په‌ریوه‌ به‌سه‌ر هاتنی ژماره‌یه‌كی زۆر له‌ نووسه‌ران و ڕۆژنامه‌نووسانی عه‌ره‌ب بۆ باشووری كوردستان و به‌ شایسته‌ترین شێوه‌ پێشوازیی و خزمه‌تیان كرا،هه‌روه‌ها هه‌ر له‌م چه‌ند مانگه‌ی ڕابردوودا كۆنفرانسی دیالۆگی عه‌ره‌بی-كوردیی له‌ هه‌ولێر به‌سترا.
ئه‌م هه‌ڵوێسته‌ شۆڤینیانه‌یه‌ی ڕۆژنامه‌نووسانی عه‌ره‌ب،له‌ كاتێكدایه‌ كه‌ ڕۆژنامه‌نووسانی كورد یادی 106 ساڵه‌ی له‌ دایكبوونی یه‌كه‌مین ڕۆژنامه‌ی كوردیی "كوردستان" ده‌كه‌نه‌وه‌ كه‌ له‌ قاهیره‌ ده‌رچوو. سه‌ندیكایی ڕۆژنامه‌نووسانی كوردستان به‌ توندی دژیی ئه‌م هه‌ڵوێسته‌ی عه‌ره‌به‌كان ناڕه‌زایه‌تیان ده‌ربڕیوه‌و سوورن له‌سه‌ر به‌شداریی كردنییان له‌ كۆنفرانسی 25 ئه‌م مانگه‌ له‌ ئه‌سینا.