كورد و هه‌ڵبژاردنه‌وه‌ی بوشی گچكه
‌
كاوه‌ ئه‌مین

ڕۆژێك دوای هه‌ڵبژاردنه‌كه‌ی ئه‌مریكا،به‌ڕێكه‌وت براده‌رێكم بینی ده‌موچاوی یه‌كپارچه‌ بزه‌ و خۆشحاڵی لێ ده‌باری. وتم ها ئه‌وه‌ خێره‌ وا گه‌شكه‌ گرتوویتی؟ له‌ وه‌لآمدا وتی ئه‌مه‌ خۆشترین ڕۆژی ژیانمه‌، ئه‌وه‌ چییه‌ ئه‌ڵێی نه‌تزانیووه‌ سه‌رۆك بوش هه‌ڵبژێردراوه‌ته‌وه‌. وتم جا به‌ تۆ چی؟ ئیتر كه‌وته‌ پیاهه‌ڵدانی كاك بوش ده‌تگوت باسی باوكی ده‌كات،له‌گه‌ڵ ناوهێنای بوشدا،كورد وتنه‌ی هه‌زار بوشی له‌ زار ده‌كه‌وته‌ خواره‌وه‌. وتم برام ئێمه‌ی كورد وه‌كو حوشتره‌كه‌ی كه‌ هه‌واڵیان پێدا حوشتر كوڕت بووه‌،ئه‌ویش وتی جا به‌من چی،من باری خۆم هه‌ر به‌ كۆڵی خۆمه‌وه‌یه‌،ئێمه‌ش بوش بێت یان كیری (مرۆڤ بزه‌ی دێتێ كه‌ ناوه‌كانیان به‌ كوردی ده‌نوسێت)،خۆ كه‌ركووك و موسڵمان له‌ده‌ست تیرۆریستان بۆ ڕزگار ناكه‌ن و بگره‌ هه‌ندێك جاریش لایه‌نگری ئه‌وان ده‌كه‌ن. براده‌ره‌كه‌م وتی چییه‌ مه‌گه‌ر ئه‌ی بوش نه‌بوو كه‌ سه‌ددامی لابرد،وتم كاكه‌ پێش لابردنی سه‌ددامیش ئه‌وه‌ 12 ساڵ بوو،ئه‌و سێ پارێزگا كوردییه‌ به‌ هه‌ردوو حوكومه‌ته‌كانیشه‌وه‌،له‌ ژێر ده‌سه‌لآتی كورد خۆیدا بوون،ڕاسته‌ لابردنی سه‌ددام گه‌وره‌ترین سه‌ركه‌وتن بوو بۆ گه‌لی كورد،به‌لآم كه‌ركووك و موسڵ دیسان هه‌ر له‌ قوڕگی دوژمندا ماونه‌ته‌وه‌ و ئه‌مریكاش پشتیوانیان لێده‌كات،ئاخر تا ئه‌و كاته‌ی كه‌ركووك و موسڵ كه‌ ئه‌مه‌ی دواییان هه‌ر باسیش ناكرێت،نه‌كه‌ونه‌وه‌ ژێر ڕكێفی ده‌سه‌لآتی حوكومه‌تی كورد خۆیه‌وه‌،هه‌ر به‌ داگیركراوی ده‌مێننه‌وه‌،جا سه‌ددام له‌سه‌ر حوكوم بێت یان ئامۆزا عه‌گال به‌سه‌ره‌كانی.
به‌هه‌ر حاڵ،براده‌ره‌كه‌م ڕۆیشت،پێده‌چوو ئه‌گه‌ر له‌به‌ر لۆمه‌ی عاله‌مێ نه‌بوایه‌،تێر جنێویشی بكردمایه‌ له‌سه‌ر خاڵه‌ بوش،ئاخر چه‌ند مانگێك له‌مه‌و به‌ر،كابرایه‌كی كورد له‌ دوكانێكی به‌قاڵی،كابرایه‌كی عه‌ره‌بی دابووه‌ به‌ر ته‌ماته‌،چونكه‌ كابرای عه‌ره‌ب وتبووی: موقته‌دا له‌ بوش باشتره‌،ئه‌گه‌ر كابرای خاوه‌ن دوكان فریا نه‌كه‌وتایه‌،ڕه‌نگ بوو هه‌ر بیكردایه‌ته‌ دۆشاوی ته‌ماته‌.
ده‌ی ئه‌گه‌ر هاتوو جورج بوش له‌م چوار ساڵه‌ی داهاتوودا،له‌سه‌ر كوردی كرده‌وه‌ یان هه‌ر ته‌نها جارێك ناوی كوردستانی به‌ده‌مدا هات،شه‌رته‌ منیش بڵێم خوا ده‌ستبه‌باڵییه‌وه‌ بگرێت،هه‌روه‌ك چۆن ئه‌و هه‌موو جارێك ده‌ڵێت "خوا پشتوپه‌نای ئه‌مریكیه‌كان بێت" وه‌ك ئه‌وه‌ی هه‌ر ئه‌مریكی به‌شه‌ر بن.