له‌م جیهانه‌،په‌له‌وه‌ریش
نیشتیمانی بۆ خۆی هه‌یه
‌دارستانێ،تاقه‌دارێ
ئاواره‌ش بێ،
نێو ئه‌شكه‌وتێ،
بن پاسارێ!
چۆن شێت نه‌بم؟
نه‌چم به‌گژ كوێستانێكاو
چوار ڕێیانی گه‌ردوون نه‌گرم
هێشتا بستێ خاك شك نابه‌م
تێیدا بژیم،تێیدا بمرم!
چۆن شێت نه‌بم!
هه‌موو ڕێگام لێ به‌ستراوه‌
به‌هه‌ر جاده‌ و شه‌قامێكا ڕاده‌بوورم
ته‌پۆڵكه‌یه‌ك
كلآوێكی سه‌ربازانه‌ی له‌سه‌رناوه‌
دڵ و گیرفان ده‌پشكنێ
به‌ڵگه‌ی خواشم له‌گه‌ڵ دابێ ڕێگام ده‌گرێ
نه‌كا نه‌خشه‌ی ولآتێكم له‌ گیرفان و
ڕه‌مزی نهێنی ناوێكم له‌ دڵدابێ!
چۆن شێت نه‌بم؟
تووڕه‌م، تووڕه‌، وه‌ك ئاگرم
شمشێرێكی هه‌ڵكێشراوم
له‌ناو بریسكه‌ی خۆێنی خۆما ئه‌زریكێنم.
هه‌تا كالان نه‌دۆزمه‌وه‌
ئۆقره‌ ناگرم!
خوا ئه‌زانێ
من حه‌ز انكه‌م،وه‌ك ئه‌شقیا
سه‌رگه‌ردان بم له‌م كوێستانه‌
ڕێگام بده‌ن بێمه‌ خوارێ!
هیچم ناوێ له‌م جیهانه‌
جگه‌ نه‌ختێ سه‌ربه‌ستی و
ئالآیه‌ك و
ڕه‌شماڵێكی قه‌ره‌جانه‌!

* له‌ گۆڤاری (ڕامان) وه‌رگیراوه‌