كاوه‌ ئه‌مین
‏ 107 ساڵ پێش ئێستا، كاتێك یه‌كه‌مین ڕۆژنامه‌ی كوردیی (كوردستان) له‌لایه‌ن به‌درخانییه‌كانه‌وه‌ به‌ زمانی ‏كوردی له‌ قاهیره‌ بلآوكرایه‌وه‌، ده‌وڵه‌تی عوسمانی به‌ هه‌موو هێزێكیه‌وه‌ كه‌وته‌ به‌ربه‌ره‌كانێی و، داوای له‌ ‏ده‌سته‌لآدارنی ئه‌و ولآته‌ كرد كه‌ ڕۆژنامه‌كه‌ دابخه‌ن و هه‌موو ئه‌و كوردانه‌یش كه‌ له‌ كوردستان ده‌یانخوێنده‌وه‌ ‏سزا ده‌دران و زیندانی ده‌كران. له‌ ماوه‌ی ئه‌و سه‌د ساڵه‌ی دوایشدا ده‌وڵه‌تی نوێی توركیی به‌ هه‌موو شێوه‌یه‌ك ‏به‌ربه‌ره‌كانێی زمانی كوردیی و ڕاگه‌یاندنی كوردی كردووه‌ و به‌ ده‌یان ڕۆژنامه‌نووسی كورد كوژراون یاخود ‏زیندانی كراوان. كاتێكیش كوردانی دانیشتووی ئه‌وروپا بۆ زیندوڕاگرتنی زمان و كولتووری كوردی هه‌چ ‏هه‌نگاوێكیان نابێت، توركیا وه‌ك هه‌میشه‌ فشاری خستۆته‌ سه‌ر ولآتانی ئه‌وروپا تا ڕێگا له‌ كوردانی ‏دانیشتووی ئه‌و ولآتانه‌ بگرێت. كاتێك ده‌وڵه‌تی سوێد له‌ ساڵی 1984 بڕیاری دا، ڕه‌وزه‌یه‌ك بۆ مندالآنی كورد ‏بكرێته‌وه‌، توركیا به‌ ئاشكرا ناڕه‌زایه‌تی خۆی ده‌ربڕی.‏ئێستاش توركیا ده‌یه‌وێت به‌ ڕێگای دیبلۆماسی و فشاری ئابوورییه‌وه‌، ده‌وڵه‌تی دانمارك ناچار بكات ڕێگا له‌ ‏وه‌شانی ته‌له‌فیزیونی كوردی ڕۆژ بگرێت كه‌ له‌ماوه‌ی ئه‌م چه‌ند ساڵه‌ی كاركردنیدا خزمه‌تێكی یه‌كجار زۆری به‌ ‏كولتوور و زمانی كوردی كردووه‌ و سه‌دان به‌رنامه‌ی كولتووریی و سیاسی و وه‌رزشی و ئاینی (ئیسلام، یه‌زیدی ‏و مه‌سیحی) و به‌رنامه‌ی مندالآن و لاوان و ته‌ندروستی و ...هتد بلآوكردۆته‌وه‌. یه‌كه‌مین ته‌له‌فیزیونی كوردییه‌ ‏كه‌ به‌ به‌رده‌وامی له‌سه‌ر مافی ژنان به‌ده‌نگ هاتووه‌. ‏ئێمه‌ داو له‌ ده‌وڵه‌تی دانمارك ده‌كه‌ین كه‌ ئه‌و ده‌نگه‌ كوردییه‌ كپنه‌كات و مل بۆ فشاره‌كانی توركیا كه‌چ نه‌كات، ‏ڕێگا به‌ ڕۆژ تیڤی بدات به‌رده‌وام بێت له‌ خزمه‌تكردنی كولتوور و زمانی كوردی كه‌ ڕاسته‌وخۆ له‌ژێر هه‌ڕه‌شه‌ی ‏ده‌وڵه‌تی توركیا دایه‌.‏
به‌ڵێ بۆ په‌یڤی ئازاد.‏