كۆچی دوای

لاوه‌ند نه‌وزاد

به‌خه‌م و په‌ژاره‌یه‌كی زۆره‌وه‌، هه‌واڵی كۆچی دوایی به‌رێز كاره‌بای باوكی هه‌ریه‌ك له‌: (كاكه‌ سه‌هۆڵ و خاتوو رووناك و رۆشناو فێنك) و برای به‌رێزان (ئاوو به‌نزین و غاز) راده‌گه‌یه‌نین كه‌ به‌نه‌خۆشییه‌كی كوشنده‌ كۆچی دوایی كرد.له‌رێوره‌سمێكی شایسته‌دا كه‌ به‌رِێزان (موه‌لیده‌و فانوس و گلۆپی شه‌حن و باوه‌شێن و خاتوو چرا) ئاماده‌ی بوون، ته‌رمی پیرۆزی كاره‌با له‌گۆرِستانی ئه‌دیسۆن به‌خاك سپێردرا.دوای ناشتنی ته‌رمی كۆچكردوو، كاكه‌ سه‌هۆڵی كورِی كاره‌با وتاری بنه‌ماڵه‌ی پێشكه‌ش كردو باسی له‌كاره‌ ناوازه‌كانی باوكی كرد له‌خزمه‌تكردنی خه‌ڵكی به‌شه‌ره‌فدا.هه‌روا وتی: (باوكم هه‌ر له‌سه‌رده‌می به‌رِێز ئه‌دیسۆنه‌وه‌ تاكو دوا ساته‌كانی ژیانی خزمه‌تی خه‌ڵكی كردو خۆشی و شادی خسته‌ ناو ماڵی ملیۆنان كه‌س).به‌ڵام به‌هۆی گریانی زۆری كاكه‌ سه‌هۆڵ و له‌ترسی توانه‌وه‌ی له‌شی، نه‌یتوانی درێژه‌ به‌ وتاره‌كه‌ی بدات. دواتر به‌رِێز موه‌لیده‌ی تایگه‌ر وتارێكی به‌نرخی پێشكه‌ش كردو وتی: ( ئه‌مرِۆ به‌شداریمان له‌ ناشتنی به‌رِێز كاره‌بادا كرد، كه‌ خزمه‌تێكی بێوێنه‌ی مرۆڤایه‌تی كردووه‌ له‌م ده‌ڤه‌ره‌دا، به‌ڵام كۆچی دوایی ناوبراو گوشارێكی زیاتر ده‌خاته‌ ئه‌ستۆی ئێمه‌ كه‌ ده‌بێ هه‌وڵ بده‌ین، له‌جیاتی ئه‌و خزمه‌ت بكه‌ین)هه‌ر له‌دوای رێوره‌سمی ناشتنه‌كه‌، فانوسی چینی قسه‌ی بۆ ئاماده‌ بووان كردو وتی: (ئێمه‌ به‌نوێنه‌رایه‌تی خه‌ڵكی وڵاتی چین هاتووین بۆ به‌شداریكردن له‌و مه‌راسیمه‌دا، هه‌روه‌ك ده‌مه‌وێ پێتانی رابگه‌یه‌نم كه‌ حكومه‌تی چین به‌ڵێنتان پێ ده‌دات كه‌ درێغی نه‌كات له‌ناردنی هه‌زارانی وه‌ك ئێمه‌ بۆ شارو لادێكان تاكو له‌پێناوی رووناككردنه‌وه‌ی ماڵه‌كانتاندا بسووتێین).شایانی باسه‌، برِیاره‌ له‌چه‌ند رۆژی داهاتوودا ده‌یان هه‌زار سپلیت خۆپیشاندانێك بۆ به‌رده‌م وه‌زاره‌تی كاره‌بای عیراق ساز بكه‌ن و تێیدا داوای هیَنانی موه‌لیده‌ی گه‌وره‌ بكه‌ن بۆ ناو وڵاته‌كه.

انا لله وانا الیه‌ راجعون