پرۆفیسۆر د.ئەوڕەحمانی حاجی مارف کۆچی دوایی کرد

بەداخ و پەژارەیەکی زۆرەوە، سەعات 10.30ی شەوی 89/7/2007 مامۆستاو زانای گەلەکەمان پرۆفیسۆر د.ئەوڕەحمانی حاجی مارف ڕاوێژکاری دامەزراوەی خەندان بۆ پەخش و وەشاندن، بەڕووداوێکی دڵتەزێنی هاتوچۆ کۆچی دوایی کرد.خوالێخۆشبوو ساڵی 1940 لەشاری سلێمانی لەدایکبووەو ساڵی 1961 بۆ خوێندن چۆتە یەکێتی سۆڤێتی ئەو کات و لەزانکۆی لینینگراد بڕوانامەی لەزمان و ئەدەبی کوردیدا بەدەستهێناوەو لەبەر گرنگی نامەی دکتۆراکەی ڕۆژنامەی (پراڤدا) بەبایەخەوە باسی کردووە. هەروەها پەیمانگای ئەکادیمی زانستی سۆڤێتی هەر لە لینینگراد تەواوکردووەو ساڵی 1972 گەڕاوەتەوە بۆ عیراق و لە زانکۆی بەغدا بووە بە پرۆفیسۆر.خوالێخۆشبوو ئەندامی کۆڕی زانیاری کورد بووە لە بەغدا و خاوەنی زیاتر لە 30 بەرهەمی دەگمەن و ناوازە بووە لە بواری زمان و ڕێزمان و فەرهەنگی کوردی و چەندین بابەت و نووسینی لە ڕۆژنامەکانی ناوخۆ و دەرەوەدا بڵاوکردووەتەوەو لە بواری وەرگێڕانیشدا چەندین بابەت و چیرۆکی لە ڕوسییەوە بۆ زمانی کوردی وەرگێڕاوەو بەچاپ گەیاندووە. خوالێخۆشبوو بەر لەکۆچی دوایی، کاتێکی زۆری بۆ تەواوکردنی فەرهەنگێک تەرخانکردبوو بەدەخاوە شەوی 89/7/2007 دەستی قەدەر بەرەو ڕیزی نەمرانی برد و بۆ هەتاهەتیە مالئاوایی لێکردین.ڕۆژی 9/8 یش تەرمی خوالێخۆشبوو لە ڕێوڕسمێکی شایستەدا لەمزگەوتی نالی-یەوە بەرەو گۆڕستانی شەهیدان لەگردی سەیوانی شاری سلێمانی بەڕێکراو لەسەر وەسێتی خۆی لەوێ بەئامادەبووی ژمارەیەک لێپرسراوی حزبی و حکومی و ڕووناکبیر و مامۆستایانی زانکۆو ستافی دامەزراوەی خەندان و رۆژنامەی ئاسۆ و هاوڕێ و دۆستانی بەخاکسپێردرا.لەوتەیەکدا پرۆفیسۆر د.عیزەدین مستەفا ڕەسوڵ بەناوی بنەماڵەی خوالێخۆشبوو، باسی لە ژیان و ڕۆڵی خوالێخۆشبوو کرد لە بواری پێگەیاندنی ڕۆڵەکانی مییللەتەکەمان و بەرهەمەکانی لە بواری زمان و ڕێزمان و ئەدەبدا کردو بەخەمخۆر و دڵسۆزێکی کەم وێنەی لەو بوارەدا وەسفکرد و سوپاسی هەموو کەس و لایەکیشی کرد بۆ بەشداریکردنیان لە ڕێوڕەسمەکەدا

سه‌رچاوه‌: ڕۆژنامه‌ی ئاسۆ