داکۆکی تاڵه‌بانی له‌ جه‌لادانی ئه‌نفال به‌تووندی ڕه‌تده‌که‌ینه‌وه‌

تاله‌بانی له‌کۆنگره‌ ڕۆژنامه‌گه‌ریه‌که‌ی‌ ڕۆژی 7/9/2007 ، له‌وه‌ڵامی رۆژنامه‌نوسێکدا، ئاماژه‌ی به‌وه‌ کرد که‌ سوڵتان هاشم مافی ئه‌وه‌ی نیه‌ له‌ سێداره و سزا بدرێت ، چونکه‌ به‌ر له‌ روخانی سه‌دامدا په‌یوه‌ندی به تاله‌بانی هه‌بووه‌ و ه‌ دژی سه‌دام بووه‌.
ئێمه‌ لێره‌دا رای ده‌گه‌یه‌نین که‌ ئه‌گه‌ر ئه‌م قسه‌یه‌ی تاله‌بانی راستیشی تێدا بێت، به‌مانای ئه‌وه‌ نایێت که‌ تاوانبار لێبوردن و سزا نه‌درێت! پاشان په‌یوه‌ندی هه‌بوون به‌ تاڵه‌بانی په‌یوه‌ندی به‌ تاوانباری و بێتاوانی تۆمه‌تبار نییه‌. ئه‌وه‌ په‌یوه‌ندی به‌ تاڵه‌بانی خۆی‌ هه‌یه‌ و کێشه‌ی دادگا نییه‌. دیاره‌‌ خودی تاوانبار ده‌یان جار له‌ ناو دادگادا ڕاشکاوانه‌ رای گه‌یاندووه‌ که‌ یه‌کێک له گه‌وره‌ ‌به‌رپرسانی سه‌ربازی بووه‌ له‌ پرۆسه‌ی گه‌لکوژی ئه‌نفالدا. به‌مه‌ش به‌شداری کاریگه‌ری هه‌بووه‌‌ له‌ له‌ناوبردنی ده‌یان هه‌زار‌ ژن و منداڵی کورد له‌ ئه‌نفالی یه‌ک، دوو، سێ و چوار که‌ زۆرترین کوشتار له‌ میانه‌یاندا کران.
شایانی بیرخستنه‌وه‌یه‌ ئه‌مه‌ یه‌که‌م جار نییه‌ تاله‌بانی‌ ده‌بێته‌ داکۆکی که‌ر و پارێزه‌ری گه‌وره‌ تاوانبارانی ژینۆسایدی ئه‌نفال، ئه‌وه‌ جگه‌له‌وه‌ی بریندارکردنی قوربانیان و گه‌لی ژینۆسایدکراوی کورده‌، هه‌ر هه‌وڵیک بۆ سوککردنی سزای تاوانباران سه‌نگه‌رگرتنه‌ له‌ خواستی ڕه‌وای قورباناین، هه‌وڵی پێشگرتنه‌ به‌ ڕه‌وتی پرۆسه‌ی قانونی پێویست. تاڵه‌بانی له‌ ساڵی 2003 دا داکۆکی له‌ تاوانباری گه‌وره‌ی ئه‌نفال نه‌زار خه‌زره‌جی کرد. وه‌به‌پێی ئه‌و زانیارانه‌ی له‌به‌رده‌ستی ئێمه‌دایه‌ فشار ده‌خاته‌ سه‌ر دادگا تا ئه‌نفالچی (وه‌فیق سامه‌رائی) راپێچی دادگا نه‌کرێت.
ئه‌و هه‌وڵوێسته‌ی تاڵه‌بانی له‌سه‌ر سوڵتان هاشمی گه‌لکوژ له‌ لایه‌ن پرۆسه‌ی قانونیه‌وه‌ گرنگی نییه‌، گوێگرتنی دادگا له‌ هه‌ڵوێستی تاڵه‌بانی ناسه‌ربه‌خۆیی و ناقانونیبوونی دادگا ده‌سه‌ڵمێنیت.
ئێمه‌ پێمانوایه‌ هیچ سه‌رکرده‌یه‌کی کورد به‌ هه‌چ بیانویه‌ک بێت، مافی مۆراڵی و قانونی نییه‌ به‌ناوی کورده‌وه‌ لێبوردن بۆ تاوانبارانی گه‌لکوژی ئه‌نفال ده‌ربکات، چونکه‌ ئه‌وانه‌ی به‌شداریان له‌ تاوانی ئه‌نفال کردووه‌، تاوانبارن به‌رامبه‌ر به‌ نه‌ته‌وه‌یه‌ک، بۆیه‌ ئه‌و پرسه‌ زۆر له‌وه‌ گه‌وره‌تره‌ که‌سێک بتوانێ یه‌کلای بکاته‌وه‌. هیوادارین په‌رپرسه‌ ده‌سه‌ڵاتداره‌کانی کورد تووشی ئه‌و هه‌ڵه‌یه‌ نه‌بن.

ناوه‌ندی چاک
‏08‏/09‏/2007 http://www.chak.be/