ته‌مه‌نێکه‌ من به‌م ژانه‌ ڕاهاتووم

فه‌رهاد شاکه‌لی


چ ئاگرێکی، ده‌مسووتێنی و
هێشتایش حه‌ز ده‌که‌م لێته‌وه‌ نزیکتر بم،
ببمه‌ باڵاگه‌ردانی گڕ و بڵێسه‌که‌ت.
ئه‌م ژانه‌ یادگارێکه‌ له‌ دڵدا کۆی ده‌که‌مه‌وه‌،
پوازی مروارییه‌،
پڕیشکی گه‌وهه‌ره‌.

ده‌بیته‌ گوڵه‌باخ
تاوێ ڕووه‌و ڕۆژهه‌ڵات ڕاده‌وه‌ستیت و
ده‌مێکیش ده‌نواڕیته‌ ڕۆژاوا؛
ده‌ته‌وێ پێم بڵێی
با ته‌مه‌نمان بکه‌ینه‌ نیشتمانی
بۆنوبه‌رامه‌یه‌کی مه‌ستیهێن.
ده‌بیته‌ یاده‌وه‌ریی ئاوێنه‌یه‌ک
پێش ئه‌وه‌ی درز ببات
له‌شولاری خه‌ونێکی به‌ ڕووتی بینیوه‌.

ده‌ڵێی خۆریت
گڕم پێ ده‌به‌خشیت و ڕووناکایی
بۆ ڕۆژه‌کانم ده‌نێریت.
ده‌ڵێی خه‌ونیت
هه‌موو به‌یانیانێک لێم ده‌تۆرێی،
هه‌موو شه‌وێکیش دێیت و ئاشتم ده‌که‌یته‌وه‌.

ڕاهاتووم. ته‌مه‌نێکه‌ من به‌م ژانه‌ ڕاهاتووم.
تۆ هه‌رچییه‌کی پێ ده‌ڵێی بیڵێ،
من ناوی ده‌نێم عه‌شق و ژیانی خۆمی پێ ده‌سپێرم.