دایه‌ تووران: ته‌رمی کووڕه‌ شه‌هیده‌که‌م ناده‌نه‌وه‌ !
2008 02 27 - 19:31
"

ڕۆژهه‌ڵات نیوز- مه‌هاباد

؛دایه‌ تووران " دایکی شه‌هید ڕزگار مه‌هابادی ( بیژه‌ن بادووزاده‌ ) و خێزانی گیراوی سیاسی کورد " هووشه‌نگ بادووزاده‌ " که‌ ئێستاکه‌ له‌ ژووره‌کانی ئیداره‌ی ئیتلاعات دا له‌ گه‌ڵ دوو هه‌ڤاڵی دیکه‌ ئه‌شکه‌نجه‌ ده‌کرێت، له‌ شاری مه‌هاباد به‌ مه‌به‌ستی وه‌رگرتنه‌وه‌ی ته‌رمی ڕۆڵه‌که‌ی دوای یه‌ک ساڵ جارێکی دیکه‌ سه‌ردانی دادگای ئینقیلابی ئه‌و شاره‌ی کرده‌وه‌، به‌ڵام له‌ جیاتی ڕێز گرتن و وڵام دانه‌وه‌ی داخوازه‌کانی له‌ لایه‌ن سه‌رۆکی دادگا و قازیه‌کانه‌وه‌ سووکایه‌تی و بێ حوورمه‌تی پێ کرا !دایه‌ تووران گووتی:سه‌رۆکی دادگا به‌ ناوی " حه‌زره‌تی " پێی گووتووه‌ که‌ کووڕه‌که‌ی تێرۆریستێکی PJAK بووه‌ و ته‌رمی هیچ تێرۆریستێکی کافر ناده‌ینه‌وه‌...دایه‌ تووران هه‌روه‌ها گووتی:کاتێک داوای ته‌رمی کوڕه‌که‌م کرد، پێم پێ ده‌که‌نین ! گاڵته‌یان پێ ده‌کردم. پێم گووتن لانی که‌م پێم بڵێن له‌ کوێتان ناشتووه‌. به‌ڵام ئه‌وان ده‌یانگووت، بۆ تێرۆریست و کافرێک که‌ له‌ دژی حکوومه‌تی ئیسلامی ئێمه‌ شه‌ڕ ده‌کات فه‌ڕق ناکات له‌ کام جه‌هه‌نه‌م بنێژرێت !!!دایه‌ تووران گووتی:ماوه‌ی ساڵێکه‌ گۆڕێکم به‌ ده‌ستی خۆم بۆ ته‌رمی کووڕه‌که‌م هه‌ڵقه‌ندووه‌ و هه‌موو ڕۆژانی هه‌ینی له‌ گوندی " قوونقه‌ڵا " – شوێنی ژیانم – سه‌ردانی گۆڕه‌که‌ی ده‌که‌م.دایه‌ تووران هه‌روه‌ها به‌ درووشمی " شه‌هید نامرن " گووتی، من مێرده‌که‌م له‌ زیندانه‌، خۆم له‌ باری ئابووری له‌ زه‌حمه‌تی دا ده‌ژیم، کووڕه‌که‌شم شه‌هید بوو، به‌ڵام ئه‌وه‌ی که‌ هێزم پێ ده‌به‌خشێت بیر و باوه‌ڕیمانه‌ به‌ سه‌رۆک ئاپۆ و هێزی گه‌ریلا. بێگوومان شه‌هیدان نامرن، چوونکه‌ مردن کاتێکه‌ که‌ هیچ که‌س نه‌بێت چه‌کیان هه‌ڵبگرێت و ڕێگه‌یان درێژه‌ بدات، به‌ڵام ئێستا به‌ هه‌زاران ڕزگاری وه‌ک ڕزگاره‌که‌ی من له‌ چیاکانن و بۆ ڕزگاری تێ ده‌کۆشن. بۆیه‌ش ده‌ڵێم ڕۆڵه‌که‌ی من و هیچ کام له‌ شه‌هیدان نه‌مردوون و هه‌تاهه‌تایه‌ ڕێزیان له‌ مێژوو دا هه‌یه‌ و زیندوون. دایه‌ تووران گووتی :ڕه‌ژیم گاڵته‌ به‌ من و به‌ ته‌رمی کووڕه‌که‌م و به‌ بیر و ڕامانی ئێمه‌ ده‌کات، گرینگ نییه‌. من چاوه‌ڕوانییه‌کی زۆرتر له‌وه‌شم له‌وان نییه‌، به‌ڵام من ته‌نیا به‌ یه‌ک درووشم وڵامی دووژمن ده‌ده‌مه‌وه‌ : " شه‌هید نامرن " ...شایانی باسه‌ بیژه‌ن بادووزاده‌ ناسراو به‌ رزگار ، ساڵی ڕابڕدوو له‌ گه‌ڕه‌کی 22ی به‌همه‌ن له‌ لایه‌ن جاشه‌کان و ئیتلاعات درایه‌ به‌ر گولله‌ و دوای ئه‌وه‌ی سێ گولله‌ی به‌ر که‌وت به‌ نارنجۆک و به‌ درووشمی وه‌ک بژی ڕیبه‌ر ئاپۆ کۆتایی به‌ ژیانی خۆی هێنا بوو...