دایكانی من دایكانی بارزان

كاوە ئەمین

دایكانی من، ناوی فیلمێكی دێكۆمێنتارییە كە باس لە تراژدیای ئەنفالكردنی بارزانییەكان دەكا، كارەساتێك كە تا ئێستاش وەكو مۆتەكەیەك دەستی ناوەتە گەرووی ئەو ژنە رەشپۆشانەی هەمیشە لە چاوەڕوانی كەسوكارەكانیاندان. دایكانی بارزان كە تێیاندایە حەوت كوڕ و مێردەكەی ئەنفالكراوە، تا ئێستاش لەگەڵ هەر لە دەرگادانێكدا خورپەیەك بە دڵیاندا دێت و هیوای ئەوە دەخوازن ئەوەی لە دەرگا دەدات، كوڕەكانیان، مێردەكانیان، براكانیان بن. كەسوكاری ئەنفالكراوانی بارزان كە بە چنگەكڕێ و هەزار دەردەسەری كونجێكیان لە گوندە كاولكراوەكانیان پێكەوە ناوە، ژیانی ئەمڕۆیان لە هەموو رۆژێكیان ناخۆشترە، حكوومەتی هەرێمی كوردستان وەكو هەر ئەنفالكراوێكی دیكەی ئەو وڵاتە، بارزانییەكانیشی پشتگوێخستووە، ئێستا ئەو پیرەژن و دایكانەی بارزان كە هێندە گریاون، چی دیكە فرمێسك لە چاوەكانیان نایێت، هەر خۆیان دكتۆری دەروونی خۆیانن و هاوكاری یەكتر دەكەن لە گوندەكانیاندا، بەشێوەیەك دەڵێی ئەو دەڤەرە‌ حكوومەتیشی تێدا نییە.25 ساڵە ‌كەسوكاری بارزانییە ئەنفالكراوەكان، تەنیا یادگارییەك كە لە پیاوەكانیان بۆیان ماوەتەوە ئەو برە وێنانەن كە دەستاو دەستیان پێدەكەن، یانیش بە دیواری ماڵە قوڕینەكانیاندا هەڵیانواسیوون، ئەوە تەنیا سەروەتێكە بۆیان ماوەتەوە. رەنگە زۆر كەس پێیوابێت ئەوانە لەبەر ئەوەی بارزانین و ئەمڕۆش بەشێكی گرنگی دەسەڵات بە دەست پارتییەوەیە، ئیدی دەڤەری بارزان و كەسوكاری ئەنفالكراوەكان ماڵەكانیان لە زێڕ گیراوە، یان هیچ نەبێت وەكو ماڵی كۆنە بەعسی و پیاوكوژەكانی رژێمی عروبە رازێنراونەتەوە‌، بەڵام هەركەس ئەو‌ فیلمە ببینێت بۆی دەردەكەوێت كە كەسوكاری ئەنفالكراوەكان لە چ رەوشێكی نالەباردا دەژین، ئەمەش لە بارزانەوە تا گەرمیان هیچ جیاوازییەكی نییە.لە رۆژنامەی (رووداو)دا خوێندمەوە كە چۆن بەرپرسێكی كورد ئامادەیە ماڵەكەی خۆی بۆ كاك (مەشهەدانی) دۆستی كورد چۆڵبكات، من دڵنیام كە هیچ بەرپرسێكی كورد ئامادە نییە نەك ماڵەكەی خۆی بۆ كەسوكاری ئەنفالكراوێك، ئاوارەیەكی كەمپی مەخموور و ئاوارەیەكی باریكە چۆڵبكات، بەڵكو بە چاوێكی سووكیش تەماشایان دەكەن. ماڵەكەی مەشهەدانی لە هەولێر و ئەوەكەی تەها محێدین لە دوكان و ئەوانەی دیكە كە لە كوردستان بۆیان دروستكراوە، دەیان گوندی نموونەیی بۆ كەسوكاری ئەنفالكراو و شەهیدانی دیكەی‌ پێ دروستدەكرا، بەڵام كورد وتەنی ماڵ لە خاوەن ماڵ حەر‌امە. لە داهاتووشدا ئەوە منداڵی ئەنفالكراوەكانن كە دیسان دەبنە خۆراكی شەڕ و پاراستنی كەرامەتی ئەو گەلە.من تەنها لە شتێك تێناگەم، كە ئاخۆ بەرپرسانی ئەم وڵاتە بە كۆنە بەعسی و بە كۆنە پێشمەرگەیانەوە چۆن روویان دێت لە ئاست كەسوكاری ئەنفالكراو و شەهیدانی ئەم وڵاتەدا سەر هەڵبڕن؟

تێبینی: ئه‌م وتاره‌ له‌ ڕۆژنامه‌ی (رووداو) دا بڵاو کراوه‌ته‌وه‌.