کاتێکی دیاریکراو

حوسێن هیممه‌تی

پیاوه‌كه‌ زۆر دره‌نگ، ماندوو له‌سه‌ر كاره‌كه‌ی گه‌رِایه‌وه‌ ماڵ، له‌به‌رده‌م ده‌رگا كورِه‌ ته‌مه‌ن 5 ساڵانه‌كه‌ی بینی كه‌ چاوه‌رِێی ده‌كرد:- سڵاو باوكه‌! پرسیارێكت لێ بكه‌م؟

به‌ڵی حه‌تمه‌ن. چ پرسیارێكت هه‌یه‌ بیكه‌ كورِم؟

باوكه‌! ئێوه‌ بۆ هه‌ر كاتژمێری كاره‌كه‌تان چه‌ند پاره‌ وه‌رده‌گریت؟

باوكی به‌ناره‌حه‌تی وه‌ڵامی دایه‌وه‌: ئه‌وه‌ هیچ په‌یوه‌ندییه‌كی به‌تۆ نییه‌. بۆچی ئه‌و جۆره‌ پرسیارانه‌ ده‌كه‌ی؟

ته‌نیا ده‌مه‌وێ بزانم.

ئه‌گه‌ر ده‌ته‌وێ بزانی، باشه‌ پێت ده‌ڵێم: 20 دۆلار!كورِه‌ بچووكه‌كه‌ له‌كاتێكدا سه رى دانواندبوو، هه‌ناسه‌یه‌كی قوڵی هه‌ڵكێشاو، سه‌ری بڵند كردو ته‌ماشای باوكی كردو گوتی: باوكه‌ ده‌بێ 10 دۆلارم به‌قه‌رز پێبده‌ی؟

باوكی توورِه‌ بوو و گوتی: ئه‌گه‌ر هۆی پرسیار كردنت هه‌ر بۆ ئه‌وه‌ بووه‌، كه‌ بچیت و به‌و پاره‌یه‌ كه‌لوپه‌لی یاری پێ بكرِیت، به‌راستی به‌هه‌ڵه‌ داچوویه‌. یه‌كسه‌ر برۆ ژووره‌كه‌ت و بیر له‌وه‌ بكه‌وه‌ كه‌ چه‌نده‌ خۆویستی. من هه‌موو رۆژێك به‌سه‌ختی كار ده‌كه‌م و، بۆ ئه‌و جۆره‌ ره‌فتاره‌ منداڵانه‌یه‌ كاتم نییه‌.

كورِه‌ بچووكه‌كه‌، ئارام و بێده‌نگ به‌ره‌و ژووره‌كه‌ی رۆیشت و ده‌رگای داخست.باوكی له‌سه‌ر كورسی دانیشت و زیاتر توورِه‌ بوو: چۆن رێگه‌ به‌خۆی ده‌دات، ته‌نیا بۆ وه‌رگرتنی پاره‌ ئه‌و جۆره‌ پرسیارانه‌م لێ بكات؟!

.دوای نزیكه‌ی كاتژمێرێك باوكه‌كه‌ كه‌مێك هێدی بووه‌وه‌و بیری له‌وه‌ كرده‌وه‌و كه‌ به‌ڵكو ئه‌و ره‌فتاره‌ی به‌رامبه‌ر كورِه‌ بچوكه‌كه‌ی كردوویه‌تی زۆر توندو نابه‌جێ بووه‌. به‌ڵكو له‌راستیدا شتێك بووه‌ كه‌ ئه‌و كورِه‌ بۆ كرِینی پێویستی به‌ 10 دۆلاره‌. به‌تایبه‌ت ئه‌وه‌ی كه‌ زۆر كه‌م روویداوه‌ كه‌ كورِه‌ بچووكه‌كه‌ی داوای پاره‌ی له‌باوكی كردبێت.پیاوه‌كه‌ به‌ره‌و ژووری كوره‌ بچوكه‌كه‌ی رۆیشت و ده‌رگای ژووره‌كه‌ی به‌ئارامی كرده‌وه‌.- خه‌وتووی كورِم؟- نا باوكه‌، نه‌خه‌وتووم؟- وابزانم زۆر به‌توندی له‌گه‌ڵت جووڵامه‌وه‌. ئه‌مرِۆ كاره‌كه‌م زۆر سه‌خت و درێژخایه‌ن بوو، هه‌موو ناره‌حه‌تییه‌كانم له‌سه‌ر تۆ به‌تاڵ كرده‌وه‌. ببووره‌... ها ئه‌وه‌ش ئه‌و 10 دۆلاره‌ی داوات كردبوو.كورِه‌ بچووكه‌كه‌ دانیشت، پێكه‌نی و هاواری كرد: زۆر سوپاس باوكه‌! دواتر ده‌ستی برده‌ ژێر سه‌رینی و چه‌ند پاره‌یه‌كی قورمچاند كراوی ده‌رهێنا.باوكی كاتێك بینی كه‌ كورِه‌ بچووكه‌كه‌ی خۆی پاره‌ی هه‌بووه‌، دوباره‌ توورِه‌ بوو به‌ناره‌حه‌تییه‌وه‌ گوتی: له‌گه‌ڵ ئه‌وه‌ی خۆت پاره‌ت هه‌بووه‌، بۆچی دوباره‌ داوای پاره‌ت له‌من كرد؟كورِه‌ بچووكه‌كه‌ وه‌ڵامی دایه‌وه‌: بۆ ئه‌وه‌ی پاره‌كه‌م به‌شی نه‌ده‌كرد، به‌ڵام ئێستا من 20 دۆلارم هه‌یه‌. ئایا ده‌توانم كاتژمێرێك له‌كاتی كاری ئێوه‌ بكرِم تاكو سبه‌ی زووتر بگه‌رِێیته‌وه‌ ماڵه‌وه‌؟ من خواردنی نانی شه‌وم له‌گه‌ڵ ئێوه‌ زۆر پێخۆشه‌...!!!

سه‌رچاوه‌: