ڕۆژی 16.10.2008هه‌شته‌مین ساڵڕۆژی مه‌رگی هونه‌رمه‌ندی ئازادیخواز و مێژوویی به‌ ڕه‌گه‌ز کورد، ئه‌حمه‌د کایایه‌.ئه‌حمه‌د کایا، له‌ ساڵی 1999، به‌ تاوانی ئه‌وه‌ی که‌ گوتبووی کورده‌ و ده‌یهه‌وێت به‌ زمانی کوردی گۆرانی بڵێته‌وه‌، ڕووبه‌ڕووی هێرشی ڕه‌گه‌زپه‌ره‌ستانی تورک هاته‌وه‌.کایا به‌ هۆی گوشاره‌کان به‌ ناچار له‌ ڕۆژی 16ی مانگی نۆڤامبری ساڵی 2000، له‌ تورکیا ده‌رده‌که‌وێت و ده‌چێته‌ شاری پاریسی پایه‌ته‌ختی فه‌ڕانسه‌.به‌ڵام ته‌نانه‌ت دوای مه‌رگی ئه‌حمه‌د کایا، هێشتا ئه‌و گوشاره‌ی له‌ دژی هونه‌ری ئه‌حمه‌د کایا هه‌بوو،به‌رده‌وامه‌.هونه‌رمه‌ندی کورد ئه‌حمه‌د کایا، له‌ ساڵی 1999 له‌ شاری ئیستانبووڵ وله‌ کۆبوونه‌وه‌یه‌ک دا که‌ زۆر ڕۆژنامه‌وانیش تێی دا ئاماده‌ بوون، گوتبووی،من ده‌مهه‌وێ به‌ زمانی کوردی گۆرانی بڵێمه‌وه‌.

کایا هه‌روه‌ها گوتبووی، من له‌ ته‌له‌ڤیزیۆنێک ده‌گه‌ڕێم که‌ کلیپی گۆرانی کوردی بڵاو بکاته‌وه‌.له‌و به‌ینه‌ دا ژووماره‌یه‌ک له‌و هونه‌رمه‌ده‌ تورکانه‌ی که‌ ڕه‌قیان له‌و قسه‌ی ئه‌حمه‌د کایا هه‌ستابوو، خۆیان ڕانه‌گرت و هێرشیان کرده‌ سه‌ری و ئه‌حمه‌د کایایان وه‌ک خایین به‌ ناو کرد !کایا که‌ ڕووبه‌ڕووی هێرش و گوشار هاتبۆوه‌، دواتر ناچار بوو که‌ بچێته‌ وڵاتی فه‌ڕانسه‌ و له‌ شاری پاریس نیشته‌ جێ ده‌بێت.ئه‌حمه‌د کایا به‌ هۆی کولتوری بن پێ خستن و شۆڤێنیزم، له‌ وڵات و ئه‌وینه‌کانی دوور ده‌که‌وێته‌وه‌، به‌ڵام ئه‌و له‌ ناو دڵی خۆی دا توانیبووی خۆشه‌ویستی و بیره‌وه‌ری وڵات ڕابگرێت و هه‌ر به‌ هۆی ئێش و ئازاری ئه‌و ئه‌وینه‌شه‌وه‌، له‌ ڕۆژی 16 نۆڤامبری ساڵی 2000 دا دڵی ده‌وستێت و ژیانی له‌ ده‌ست ده‌دات.ئه‌حمه‌د کایا له‌ درێژایی ژیانی به‌رزی هونه‌ری خۆی دا،له‌ دژی هزری قه‌ده‌غه‌ کارانه‌ و فاشیزم، له‌ پێناو ئازادی و دێمۆکراسی، 18 ئاڵبۆمی موزیک و گۆرانی تۆمار کردووه‌ و گه‌لێک جارانیش به‌ تاوانی به‌رهه‌مه‌کانی ڕووبه‌ڕووی زیندان و ئه‌شکه‌نجه‌ هاتووه‌ته‌وه‌.به‌ڵام ته‌نانه‌ت دوای کۆچی دوایی ئه‌حمه‌د کایا، هێشتا ئه‌و کولتوری قه‌ده‌غه‌ کردن له‌ دژی خواسته‌کانی ئه‌حمه‌د کایا درێژه‌یان هه‌یه‌.هاوسه‌ری ئه‌حمه‌د کایا، گوڵته‌ن کایا، له‌ به‌رده‌وام و له‌ هه‌موو هه‌ل و مه‌رجێک دا له‌ په‌نای ئه‌حمه‌د کایا بووه‌ گوتی، کایا له‌ هه‌موو شوێنێک، له‌ ناسنامه‌ی کوردی خۆی خاوه‌نداریه‌تی کردووه‌.گوڵته‌ن گوتی،هه‌ڵوێستی ئه‌حمه‌د کایا له‌ ساڵی 1999، هه‌ڵوێستێک بوو، له‌ ده‌ستپێکه‌وه‌ هه‌تا ئێستا، خاوه‌نی یه‌ک ناوه‌ڕۆکه‌ و ئه‌ویش په‌یامی ئیدی به‌سه‌ بوو.له‌ هه‌مان کات دا، هونه‌رمه‌ندێکی دیکه‌ به‌ ناوی چه‌تین ئۆرانه‌ر، که‌ خۆی شاهیدێکی گوشاره‌کانی سه‌ر ئه‌حمه‌د کایا بووه‌، گووتی،ئه‌حمه‌د کایا ده‌یگووت، ئه‌گه‌ر له‌م وڵاته‌ دا فاشیزم و شۆڤێنیزم تا ئه‌و ئاسته‌ باڵا ده‌ست بێت، پێویسته‌ مرۆڤ له‌ دژی ئه‌و چه‌مکه‌، به‌ بڕیاڕ بێت و تێکۆشانی خۆی به‌ڕێوه‌ به‌رێت. به‌ده‌لی ئه‌و تێکۆشانه‌ش، چی ده‌بیت با ببێت.

سه‌رچاوه‌: ماڵپه‌رێ رۆژهه‌ڵات