كاوه‌ ئه‌مین

رووداونێت – سوێد

ئێواره‌ی 12/2/2009 ده‌وڵه‌تی سوێد، نزیكه‌ی په‌نجا په‌نابه‌ری كورد و عێراقی به‌ زۆره‌مڵێ ره‌وانه‌ی شاری به‌غدا كرده‌وه‌.به‌ گوێره‌ی هه‌واڵه‌كان، ژماره‌یه‌كی زۆر پۆلیسی سوێدی به‌شداریان له‌ ناردنه‌وه‌ی په‌نابه‌راندا كردووه‌، په‌نابه‌ره‌كان له‌ فرۆكه‌خانه‌ی گۆته‌نبێرگه‌وه‌ به‌ره‌و به‌غدا به‌ڕێكراون. ژماره‌یه‌ك چالاكڤانی مافی مرۆڤ له‌ فرۆكه‌خانه‌ كۆبوونه‌وه‌ تا رێگه‌ له‌ گێڕانه‌وه‌ی په‌نابه‌ران بگرن، به‌ڵام به‌ هۆی زۆری ژماره‌ی پۆلیس و رێگه‌ نه‌دانیان نه‌یانتوانی رێگه‌ له‌ نه‌گێڕانه‌وه‌ی په‌نابه‌ره‌كان بگرن و به‌ قسه‌ی یه‌كێك له‌و چالاكڤانانه‌، پۆلیس هه‌ڕه‌شه‌ی كوشتنی لێكردووه‌ ئه‌گه‌ر ده‌ستبه‌رداری ناڕه‌زایه‌تییه‌كانیان نه‌بن. قسه‌كه‌ری ئۆفیسی كۆچ له‌ سوێد، لویسه‌ ئوته‌ر به‌ ته‌له‌فوون ئه‌وه‌ی بۆ (رووادونێت) پشت ڕاستكرده‌وه‌ كه‌ دوێنێ، په‌نجا په‌نابه‌ری عێراقی و كورد ره‌وانه‌ی به‌غدا كراونه‌ته‌وه‌ و له‌ داهاتووشدا، درێژه‌ی ده‌بێت. ئێمه‌ له‌ هه‌وڵی ئاماده‌كاردنی راپۆرتێكداین له‌مه‌ڕ بارودۆخی هه‌نووكه‌یی ئه‌و په‌نابه‌رانه‌ی كه‌ مه‌ترسی گه‌ڕانه‌وه‌یان لێده‌كرێت.