له‌ به‌یاننامه‌ی کۆتایی کۆنفرانسی پارتی چه‌پی سوێدی له‌ ناو په‌رله‌مانی ئه‌وروپا که‌ دانه‌یه‌کی نێرداروه‌ بۆ (ڕووداو نێت) ، پارتی چه‌پ به‌ تووندی کرده‌وه‌کانی تورکیا دژی کوردانی باکووری کوردستان، شه‌رمه‌زار ده‌کات. له‌ به‌یاننامه‌که‌دا هاتووه‌:"ده‌بێت ده‌وڵه‌تی تورکیا ده‌ستبه‌جی، گوشاره‌کانی له‌سه‌ر پارتی کوردی کۆمه‌ڵگه‌ی دیموکراتی هه‌ڵبگرێت. یه‌کێتی ئه‌روپا، سوێد و کۆمه‌ڵگه‌ی نێونه‌ته‌وه‌یی ده‌بووایه‌ ده‌وڕێکی کاریگه‌رانه‌یان بگێڕایه‌ و گوشاریان بخستایه‌ته‌ سه‌ر تورکیا". هه‌فته‌ی رابردو له‌ په‌رله‌مانی ئه‌وروپادا، پارتی چه‌پ کۆنفرانسێکیان له‌سه‌ر ڕه‌وشی تورکیا به‌ ناوی (The kurdish human rights situation, a lasting peace and democratic developent)ڕه‌وشی مافی مرۆڤی کورد، ئاشتییه‌کی به‌رده‌وام و گه‌شه‌کردنی دیموکراتی، به‌ست.له‌ به‌یاننامه‌که‌دا پارتی چه‌پ باسی هه‌ڵبژاردنه‌کانی 29 ئاداری 2009 و سه‌رکه‌وتنه‌کانی DTP یان به‌ بیرهێناوه‌ته‌وه‌ و ئاماژه‌یان به‌ گرتنی ئه‌ندامانی پارتی کۆمه‌ڵگه‌ی دیموکراتی داوه‌ به‌ بیانووی په‌یوه‌ندییان به‌ تیرۆر و بریندارکردنی هه‌ستی تورکێتیه‌وه‌، ئه‌وه‌یش به‌ پشتیوانی ماده‌ی 301 له‌ قانوونی بنچینه‌یی تورکیا. ئه‌ندامی په‌رله‌مانی ئه‌وروپای پارتی چه‌پ، ینس هۆڵم ده‌ڵێت: شتێکی سه‌یره‌ که‌ ده‌وڵه‌تی تورکیا ناتوانێت سه‌رکه‌وتنه‌کانی DTP قبووڵ بکات. ئێمه‌ هه‌موو هه‌وڵێکی خۆمان ده‌خه‌ینه‌ گه‌ڕ بۆ گوشار خستنه‌ سه‌ر تورکیا تا زیندانیکراوه‌کان ئازاد بکات و سته‌مکارییه‌کان رابگرێت.له‌ شاری گه‌وره‌ی دیاربه‌کر، کاندیدی DTP، عوسمان بایده‌میر وه‌کو سه‌رۆک شاره‌وانی هه‌ڵبژێردرا، ئێستا بایده‌میر هه‌ڕه‌شه‌ی زیندانیکردنی لێده‌کرێت دوای ئه‌وه‌ی به‌ قانوونی دژه‌ تیرۆر دادگایی ده‌کرێت.بێریڤان ئۆنگورو کاندیدی پارتی چه‌پ بۆ په‌رله‌مانی ئه‌وروپا ده‌ڵێت: ده‌بێت هه‌رچی زووتره‌ ئه‌و تاوانانه‌ی خراونه‌ته‌ پاڵ عوسمان بایده‌میر، هه‌ڵوه‌شێنرێنه‌وه‌، چونکه‌ ئه‌گه‌ر ئه‌و وه‌کو هه‌ڵبژێردراوێک له‌ لایه‌ن خه‌ڵکه‌وه‌ له‌ گه‌وره‌ترین شار تاوانی تیرۆری بخرێته‌ پاڵ، ئه‌وا به‌و مانایه‌ دێت که‌ که‌س ناتوانێت له‌ خۆی دڵنیا بێت.له‌ سه‌ره‌تای مانگی یونی ئه‌مساڵدا، سوێد بۆ ماوه‌ی شه‌ش مانگ سه‌رۆکایه‌تی یه‌کێتی ئه‌وروپا ده‌گڕێته‌ ده‌ست، له‌و باره‌یه‌وه‌ ئامینه‌ کاکه‌باوه‌ ئه‌ندام په‌رله‌مانی سوێد پێیوایه‌ که‌ فرسه‌تێکی باشه‌ بۆ وڵاتی سوێد که‌ کار بۆ باشکردنی هه‌لومه‌رجی سیاسی تورکیا بکات.ئه‌مینه‌ كاكه‌ باوه‌ ده‌ڵێ "من و پارته‌که‌م، پارتی چه‌پ، هه‌وڵده‌ده‌ین که‌ کارێک بکه‌ین که‌ ده‌وڵه‌تی سوێد، کێشه‌ی کورد و که‌مینه‌کانی دیکه‌ له‌ تورکیا، بخاته‌ رۆژه‌ڤی خۆیه‌وه‌"‌.