سوێد بەرامبەر پەناخوازانی كورد تووندبووە و بەرامبەر بەعسیان نەرمە

كاوە ئەمین
رووداو - سوێد
حكومەتی سوێد بە 16 پەناخوازی كوردی باشووری كوردستان و عێراقی راگەیاندووە كە ئەگەر بەخۆشی خۆیان نەگەڕێنەوە بە زۆرەملێ لەلایەن پۆلیسەوە دەنێردرێنەوە، بەڵام مەسەلەی ناردنەوەی بەعسییەكی عێراقی كە دەستی لە ئەشكەنجەدانی گیراواندا هەبووە، بووەتە جێگەی مەترسی دەزگای كۆچی سوێد.
رۆژی 21/9/2009، هەواڵی دەركردنی پیاوێكی عێراقی لەلایەن دەوڵەتی سوێدەوە بڵاوكرایەوە. پۆلیسی نهێنی سوێد (سێپۆ) لەو بارەوە رایگەیاند "ئەو پیاوە عێراقییە مەترسی بۆ سەر ئاسایشی سوێد هەیە، بۆیە دەبێ رەوانەی عێراق بكرێتەوە". ئەم بڕیارەی سوێد لە كاتێكدایە كە دەزگای كۆچی سوێدی پێیوایە كە ژیانی ئەو پیاوە دەكەوێتە مەترسییەوە ئەگەر رەوانەی عێراق بكرێتەوە.
ئەو پیاوە عێراقییە لە ساڵی 2003 دا هاتووەتە سوێد و ژن و منداڵەكانی مۆڵەتی مانەوەیان لە سوێد پێدراوە. ئەو پیاوە لە كێسەكەیدا باسی ئەوەی كردووە كە لە عێراق لەگەڵ دەزگایەكی نهێنی سەردەمی بەعس كاری كردووە كە زیندانییەكانیان ئەشكەنجە داوە.
تائێستا چەندین جار باسی ئەوە كراوە كە بەرپرسانی بەعس لە سوێد داڵدەدراون، بەهۆی سوود وەرگرتنیان لە یاساكانی سوێد بۆ مانەوە بە بیانووی ئەوەی كە ژیانیان لە مەترسیدایە لە عێراق. لەو بارەوە كوردێك كە كاری وەرگێڕان دەكات لە سوێد بە(رووداو)ی راگەیاند كە لە دوای رووخاندنی رژێمی سەدام لەساڵی 2003 كوردی وا هەبوونە بۆ ئەوەی بتوانن مافی پەنابەری وەربگرن خۆیان بە بەعسی ناساندووە.
لەلایەكی دیكەوە دەزگای كۆچی سوێدی لە كۆبوونەوەیەكدا كە لە 23/9/2009 لەگەڵ بەرپرسانی دەزگاكانی كۆچی وڵاتانی ئەوروپا رێكیخستبوو، داوایكرد كە وڵاتانی ئەوروپا ئەو پەناخوازانە وەربگرن لەو كەمپانەی جیهاندان بۆ پەنابەران دروستكراون و تێیاندا ژیانێكی ناخۆش بەسەر دەبەن. هەر لەو كۆبوونەوەیەدا كە لە ستۆكهۆڵم بەسترا، وڵاتانی ئەوروپا گفتوگۆیان لەسەر ئەوە كردووە كە بە چ شێویەك بتوانن ژمارەی ئەو پەناخوازانەی ساڵانە بە رێگەیەكی یاسایی وەردەگیردرێن، زیاد بكەن.
بەڵام ئەوەی بەكردەوە لە سوێد هەیە جیاوازە. ژمارەیەكی زۆر پەناخوازی كورد و عێراقی لە زۆر وڵاتی ئەوروپایی هەڕەشەی ناردنەوەیان لێدەكرێ . هەفتەی رابردوو 16 پەناخوازی كورد و عەرەب كە لە شاری ئۆپسالای سوێد دەژین، بە فەرمی پێیان راگەیێندرا ئەوان مافی پەنابەرێتیان پێنادرێ و دەبێ لە نزیكترین كاتدا بگەڕێنەوە كوردستان و عێراق . یەكێك لەو پەناخوازانە بە (رووداو)ی راگەیاند كە پێیان راگەیێندراوە" لەو رۆژەوە هەموو مافێكتان لێ سەندراوەتەوەو تەنیا رێگا ئەوەیە بە خۆشی خۆتان بگەڕێنەوە، ئەگەرنا لە داهاتوودا، كێسەكانتان دەدرێتە پۆلیس بۆ لێكۆڵینەوە و ناردنەوەتان بەزۆرەملێیی".