چەند رۆژێكی دیكە پێدەنێینە ساڵێكی نوێوە، لە بیرم نایێت لەكەیەوە دەڵێین: هیوادارین ساڵی داهاتوو یانیش نەورۆزی داهاتوو لە كوردستانێكی سەربەخۆ و ئازاددا، بەسەر بەرین‌. ساڵان هاتن و ساڵان چوون، بەشێكی كوردستانەكەمان ئازاد بوو، بەڵام نەك هەر ئێمە نەگەڕاینەوە، بەڵكو ژمارەیەكی زۆر كوردی دیكە بارگەوبنەیان بەرەو وڵاتی نادیار تێكناو وەكو دەڵێن خۆیان خستە بەر قەدەرەوە.
راستییەكەی ویستم دوانووسینی ئەم ساڵەم لە(رووداو)دا باسی كوردستانی تێدا نەبێت، بەڵام كورد وتەنی "هەموو رێگەكان دەچنەوە بانە"، یانیش وەك ئەوروپییەكان دەڵێن بۆ ڕۆم. تۆ بڵێی لەنێو ئەو هەموو شارەی كوردستاندا بۆ بانەیان هەڵبژاردبێت، دەبێت بەهۆی گوڵی زەردوسووری سڵێمان بەگی بانەوە نەبووبێت، هەر چییەك بێت كە ناوی شاری بانە دێت دڵەخورپە دامدەگرێت، ئاخر چەند مانگێكی لاوێتیم لەو شارە بەسەر برد و، چەندین سەرگوزشتەی خۆش و ناخۆشم لە دەفتەری یادەوەرییەكانمدا لێ تۆمار كردووە.
‌زیندان بۆ ئێمەی كورد، جا وەك تاك یان وەك وڵات تا ئەوكاتەی بەداگیركراویی بمێنینەوە، هەر زیندانە، كە لەدەرەوەی كوردستانیش بین، راستە بەجەستە ئازادین، لە ترسی ئەوەی نەڵێن بابایەكی دیكتاتۆرەو خۆی بە نوێنەری تاراوگەنشینەكان دادەنێت، دەنا دەمگوت هەموومان، بەڵام ئەگەر تەنها باسی خۆم بكەم، لێرەش دەڵێی رۆحم زیندانی كراوە، جا وەرە بیر لە هەزاران زیندانی سیاسی بكەوە لە وڵاتی خۆمانەوە بگرە هەتا دوورترین شوێنی ئەم دنیایە، دەبێت ئەوان چی بڵێن! كە گوێم لە شیعرەكانی شەهیدی نەمر مەلا عەلی دەبێت كە لە زیندانی موسڵەوە نووسیوونی و شانازی دەكات پێڵاوەكانی لەو بەرزییەوە دەبینێت بە‌سەر سەری جەلادەكەیەوە، شەرم دامدەگرێت و دەڵێم ئەی ئێمە چیمان كردووە بۆ وڵاتەكەمان؟ لەم رۆژانەدا، لە فەیسبوكەوە، سیاسییەكی سوێدی بۆی نووسیبووم كە ئاخۆ بەشداری دەكەم لەو خۆپیشاندانەی دژی توركیا دەكرێت، چونكە ئەو خۆی دەچوو، دیسان لە جیاتی هەزاران كوردی ئەم وڵاتە شەر‌م دایگرتم، لەجیاتی ئێمە بەوان بڵێین ئەوان بە ئێمە دەڵێن وەرن!
زۆرجار لەگەڵ ئەو قسەیەی غاندی مەزندا بووم كە وتوویەتی: خراپترین دەسەڵاتی خۆماڵی لە باشترین دەسەڵاتی داگیركەر باشترە، كەچی ئێستا كە بیردەكەمەوە خەریكە لێی پەشیمان دەبمەوە، ئاخر كە لە تەلەفزیۆنی پارتە دەسەڵاتدارەكانی كوردستانەوە ئەو پیرەژن و پەككەوتەو نەخۆشانە دەبینم بە چاوی پڕ لە فرمێسكەوە داوای هاوكاریی دەكەن، لە وڵاتێكدا كە ژێرەكەی پڕی زێڕی رەش‌ و خاكی وەك گەوهەرە، دەی خۆ لە سەردەمی داگیركەردا خەڵك هێندە عیزەتیی نەفسی بەرزبوو كوا بۆ پاروەنانێك ئاوا دەكوڕوزانەوە، خۆ ناكرێت ئێستاش هەر هیچ نەبێت لەو سێ پارێزگایەی بەدەست خۆمانەوەیە، گلەیی لە داگیركار بكەین.
كە لە راپۆرتی رێكخراوەكانی مافی مرۆڤی رۆژئاواییەكانیشەوە باسی پێشێلكاری مافی مرۆڤ لە وڵاتەكەماندا دەكرێت، دەبێت هەموومان شەرم دامانبگرێ، ئاخر جارانیش كاتێك ئەو رێكخراوانە رەخنەیان لە سەددام و سوریا و ئێران و توركیا دەگرت، یەكسەر وەك ئەوانەی ئێستای خۆمان، بەتووندی رەتیان دەكردەوە و دەیانگوت و دەڵێن، فەرموون وەرن زیندانەكان بگەڕێن، ئێمە شازی دیموكراتین، ئێوەی رۆژئاوایی بوختانمان بۆ دەكەن.
ئەریتریا یەكێكە لەو وڵاتانەی ئەفریقیا كە دوای چەندین ساڵ شەڕی كۆلۆنیالیزم و شەڕ لەگەڵ ئەسیوپیا، سەربەخۆیی وەرگرت. هەزاران كەس خۆیان كردە قوربانی سەروەری وڵات، كەچی ئێستایشی لەگەڵدا بێت، ساڵ نییە سەدان كەس وڵاتەكەیان بەجێنەهێڵن، دەیانیش بە بەهانەی جۆراوجۆرەوە راپێچی زیندان دەكرێن.
دەمەوێت ئەم وتارە بە چەند دێرێك لەسەر ژیانی رۆژنامەنووسی ئەریتیری (داویت ئیساك) كۆتایی پێبێنم، كە هەشت ساڵ پێش ئێستا لە 23 سێپتێمبەری 2001 دا لەگەڵ چەندین رۆژنامەنووسی رەخنەگری دیكە خرایە زیندانەوە. داویت ئیساك كە وەڵاتینامەی سوێدی و ئەریتیریایی هەیە، بەمەبەستی بەشداریكردن لە پرۆسەی دیموكراتی حكومەتە ساواكەیان، گەڕایەوە بۆ ئەریتیریا و لە گەو‌رەترین رۆژنامەی وڵاتدا كە لەسەر مافی مرۆڤ و دیموكراتی وتار و رێپۆرتاژی بڵاودەكردەوە، دەست بەكار بوو. بەڵام مانگی هەنگوینی ئازادیی زۆری نەخایاند، داویت و چەندین كەسی دیكە دەستگیركران، ئەوەی جێگەی سەرنجە ئەوەیە حكومەتی ئەریتیری، رێگە نە بە سوێدییەكان، نە بە خاچی سوور و كەسوكاری نادات، سەردانی داویت ئیساك بكەن. سیستێمی حەپسخانەی ئەریتیریا وەك زۆر وڵاتی دیكە، سیستەمێكی زاڵمانەیە، زیندانییەكان زۆرتر لە ژێرزەویی و چاڵە هەڵكەندراوەكاندا دەهێڵدڕینەوە و زۆریان مەگەر بە مردوویی دەنا چاویان بە دەرەوە ناكەوێتەوە.
لەگەڵ ئەوەی زۆربەی سەرنووسەری رۆژنامە بەنێوبانگەكانی سوێد و دەیان كەسایەتی فەرهەنگی و سیاسی داوای بەردانی داویت ئیساك دەكەن، بەڵام رژێمی ئەریتیریا نەك داواكەیان قبوڵ ناكات تەنانەت رێگە نادات سێ منداڵەكەیشی سەردانی بكەن.
رۆژنامەی ئێكسپرێسی سوێدی لەو رۆژەوەی داویت ئیساك گیراوە، هەموو رۆژێك وێنەیەك و ژمارەی رۆژەكانی كە لە زینداندا بەسەری دەبات، بڵاودەكاتەوە. هەندێك رۆژنامەنووسی سوێدی، رەخنە لە حكومەتی سوێدی دەگرن كە لە هەوڵەكانی بۆ بەردانی ئیساك خەمساردە، بەتایبەتی وەزیری دەرەوەی سوێد، كارل بیلدت كە كەسێكی زۆر كۆنسەرڤەتیڤە و گومانی ئەوەی لێدەكرێت لەگەڵ زۆر كۆمپانیای نەوت لە وڵاتە هەژارەكاندا شەریك بووبێت، پێش ئەوەی ببێتە وەزیری دەرەوەی سوێد.
داویت ئیساك و هەزاران بەندكراوی سیاسی لە دنیادا چاوەڕێی ئەو رۆژەن كە بە دیداری كەسوكار و خۆشەویستانیان شاد ببنەوە، ئێمە ئەگەر بە كردەوەش هیچمان پێ نەكرێت، خۆ دەتوانین دەنگی خۆمان بخەینە پاڵ دەنگی ملیۆنان مرۆڤ كە بۆ ئازادی و ژیانێكی باشتر و رێزگرتن لە مافی مرۆڤ، ژیانی خۆیان خستووەتە مەترسییەوە و داوای ئازادبوونیان بكەین.
بەهیوای دنیاییەكی جوانتر و مرۆڤدۆستانەتر، تا نووسینێكی دیكە، هەر لە خۆشیدابن و وڵاتمان ئاوەدان بێت، نەكەن مرۆڤە چەوساوە و هەژارەكان لە بیر بكەن، مەگەر كورد ناڵێت دڵ ئاوێنەی دڵە.

تێبینی: ئه‌م وتاره‌ له‌ دوا ژماره‌ی ڕۆژنامه‌ی (ڕووداو) ی ساڵی 2009 دا، بڵاوکراوه‌ته‌وه‌.