رووداو – سوێد
ئێستا كە پایز تەنگی بەگەڵای دارەكان هەڵچنیوە و كزەبای ساردی پایزی سوێد، دەیەوێت نقوڵانەی زستانێكی دیكەی ساردوسڕمان پێبدات، شەو تەنگی بە رۆژ هەڵچنیوە و تا دێت تەمەنی كورتتر دەكاتەوە، بەپێچەوانەی دار و درەختەكانەوە كە تا دێت رووتترو رووتتر دەبنەوە، كچانی بەژنزراڤ، خۆیان پۆشتەتر دەكەن. گۆران وتەنی، پایز بووكێكی قژزەردە، مرۆڤ لەخۆیەوە، خۆی مات دەكات و گۆشەگیر و تەریك دەبێتەوە، پایزیش ئەگەرچی بۆ زۆر كەس جوانترین وەرزی ساڵە، زۆربەی جار زیزی پێوە دیارە، جا ئەوە بۆ بەشێك لە ئێمە كە هەمیشە بیری نیشتیمان دەكەین و لە كوردەكەی هەردوو جەژنە بووین، چ شتێك لەوە خۆشترە، هونەرمەندێكی وەك عەدنان كەریم ببێتە خەمڕەوێن و لەم باكووری بەفرستان و دوورەدەستەی گێتیدا، بە دەنگە خۆشەكەی كە تائێستا پاش بیست ساڵ ئاوارەیی، هێشتا دەڵێی تازە لە خزمەت (عەلی مەردان)دا بووە و دوێنێ هاتووەتە سوێد، هەموو شتێكی كوردانە، دەنگ، موزیك، جلی كوردی و هێشتا ئەنگۆرە لە پشت كە رەنگە لە كوردستانیش باوی نەمابێت، لە ئێوارەیەكی ئەم غوربەتەدا، وەكو فریادرەسێك، بەهانامانەوە دێت و تێی دەچریكێنێ. لە دیاربەكر ماڵا منەوە، بەرەو سابڵاخ و كەركووك تۆی خاكی كوردستان و شەوی یەڵداو و پاشانیش ئامینێ تاقانەی داێێ و نارینێ و ...
بەڵێ، ئێوارەی شەممە، 2ی ئۆكتۆبەر، لە شاری ئۆپسالا، لە یەكێك لە باشترین هۆڵەكانی ، خانووی كۆنسێرتی ئۆپسالا، عەدنان كەریم میوانداری كردین، یانیش ئەو میوانی ئێمە بوو. چوار موزیكژەنی كورد و دوو سوێدی و دەنگی عەدنان كەریم، لە ماوەی دووكاژێردا، ئامادەبووانیان وا حاڵ لێهێنابوو، لەو بڕوایەدام زۆریان تەنها بەلاشە لە سوێد بوون. من خۆم حەزم دەكرد لەو خەوە خۆشە خەبەرم نەبێتەوە، بەڵام خانمێكی كەركووكی، كە تەواو لە دەروێشێك دەچوو، حاڵی لێهاتبێت و سەری رادەوەشاندو، نەرمە نەرمە خۆی بادەدا و چەپڵەی لێدەدا، خەوەكەی لێ دەزڕاندم. كاتێك لە پشووەكەدا بینیم لەگەڵ هاوڕێیەكی شوانیم (خەڵكی شوان)، قسەیان دەكرد، هەردووكیان بەبێ ئەوەی من هیچ بڵێم وتیان ئێمە لە خەمی كەركووكداین، بۆیە كاتێك عەدنان كەریم، گۆرانی كەركووك تۆی خاكی كوردستانی وت، بەتەواوەتی جەزمەگرتنی. من دەمێكە وتوومە خۆزگە هەموو كوردێك كەركووكچێتی بكردایە، بۆیە لە ناخەوە لەگەڵ ئەو خانمانەدا كە بەدڵ خەمی كەركووكیان دەخوار، دەهەژام.
كاتێك تۆی خوێنەر، ئەم چەند پەیڤە دەخوێنیەوە، عەدنان كەریم، لە كوردستانە، لە هەولێر و سلێمانی لەگەڵ كامكارەكان، دوو كۆنسێرت دەگێڕن. رەنگە دەنگی عەدنان كەریم، ئاواز و موزیكەكەی، لە كوردستانێكدا كە تا جارێك گوێت لە گۆرانییەكی كوردی رەسەن دەبێت، دەیان گۆرانی توركی و فارسی و عەرەبی، دەژنەویت,وەك دەروێش عەبدوڵڵاكەی گۆران وابێت، بۆیە ئەگەر گۆران لەو‌ سەردەمەی كە هێشتا گۆرانی و موزیكی كوردی لەگرێژنە نەبرابوون، كەچی دیسانیش پێیوابووە، میزاجی كوردەواری تێكچووە، بۆیە پەنای بۆ دەروێش عەبدوڵڵا بردووە، دەبا ئەوانەیشی لەم غەزووی داگیركاری فەرهەنگییە بێزارن، ساتێك گوێ بۆ دەنگی عەدنان و موزیكی رەسەنی كامكارەكان بگرن، چونكە ئەوانە وەكو تیرۆژێك وان لەنێو شەوەزەنگی موزیكی كوردیدا، بەڵام بە دڵنیاییەوە هەر كە مانگ هەڵات زۆر ئەستێرەی بچووك خۆیان دەشارنەوە.